Papa, ungjillorëve: të kapërcehen ndarjet, që shtrembërojnë Ungjillin
Efikasiteti i kumtit të krishterë do të ishte më i madh, nëse të krishterët nuk do
të ishin të ndarë. Në takimin me Aleancën Botërore Ungjillore, Papa Françesku theksoi
sërish se ndarjet e të krishterëve e zbehin bukurinë e Ungjillit. “Ta ndihmojmë Kishën
të bëhet gjithnjë e më tepër ‘në Krishtin’ e ‘me Krishtin’”, nënvizoi Ati i Shenjtë,
duke pohuar se të ndarë, të krishterë kanë më pak forcë për të plotësuar urdhërimin
e Tënzot, i cili këshillon t’u predikohet Ungjilli të gjitha kombeve: “Realiteti
i ndarjeve tona e shëmton bukurinë e mantelit të vetëm të Krishtit, por nuk e shkatërron
krejtësisht bashkimin, që lind nga hiri i dikuar mbi të gjithë të pagëzuarit (shih
Conc. Ecum. Vat. II, Decr. Unitatis redintegratio, 13). Sigurisht
që kumti i krishterë do të ishte shumë më i frytshëm, nëse të krishterët do t’i kapërcenin
ndarjet e do të kremtonin së bashku Sakramentet, si edhe, së bashku, të mund të përhapnin
Fjalën e Zotit e të dëshmonin dashurinë e Tij”. Papa Françesku shprehu kënaqësi
për faktin se në shumë vende të botës, katolikët dhe ungjillorët kanë marrëdhënie
vëllazërore bashkëpunimi. Vuri gjithashtu në dukje punën e përbashkët të dikasterit
vatikanas për Bashkimin e të Krishterëve dhe atë të Aleancës Botërore Ungjillore për
të sqaruar keqkuptimet e për të përvijuar udhën e kapërcimit të paragjykimeve: “Të
dashur vëllezër e motra, kam besim se Shpirti Shenjt, që dikon në Kishë, përmes frymës
së tij të fuqishme, guximin për të vazhduar e për të kërkuar metoda të reja ungjillëzimi,
mund të përurojë një etapë të re në marrëdhëniet ndërmjet katolikëve dhe ungjillorëve.
Një etapë, që të mundësojë realizimin e plotë të vullnetit të Zotit për ta çuar Ungjillin
deri në kufijtë më të skajshëm të tokës (shih Vap 1,8)”.