Papa miraton normat për dorëheqjen e ipeshkvijve dhe të kardinajve
Në audiencën e sotme me Sekretarin e Shtetit të Vatikanit, kardinalin Pietro Parolin,
Papa Françesku miratoi me anë të një “Rescriptum”, normat për dorëheqjen e ipeshkvijve
dioqezanë dhe të titullarëve të zyrave, me emërim papnor. “Rescriptum” është përgjigjja
për çështje, që i shtrohen Papës në formën e një pyetjeje. Në këtë rast, siç u shpjegua
në konferencën me gazetarët nga zv.drejtori i Sallës së Shtypit të Selisë së Shenjtë,
atë Ciro Benedettini, Papa i ripropozoi - duke i përforcuar - normat e njohura, në
vazhdën e ftesës për ta konsideruar episkopatin si shërbim e jo si nder. Sipas
normave në fuqi në Kishën latine e në Kishat e ndryshme Lindore katolike, ipeshkvijtë
dioqezanë dhe eparkialë, si edhe ipeshkvijtë ndihmës “ftohen të paraqesin dorëheqjen
nga detyra e tyre baritore pasi të kenë mbushur 75 vjeç”. Pasi pranohet dorëheqja,
të interesuarit nuk kryejnë më asnjë detyrë tjetër, në nivel kombëtar. “I denjë
për vlerësim kishtar – lexohet në ‘Rescriptum’ – është gjesti i atij, që i shtyrë
nga dashuria dhe nga dëshira për t’i shërbyer më mirë bashkësisë, e konsideron të
nevojshme që, për shkak të sëmundjes, ose për arsye tjetër të rëndë, të heqë dorë
nga detyra baritore, para se të arrijë moshën 75 vjeç. Në raste të tilla, besimtarët
janë të thirrur të tregojnë solidaritet e mirëkuptim për atë, që ka qenë bariu i tyre,
duke e ndihmuar menjëherë, sipas kërkesave të bamirësisë e të drejtësisë”. “Në
disa rrethana të veçanta – vijon dokumenti – autoriteti përkatës mund ta konsiderojë
të nevojshme t’i kërkojë një ipeshkvi të heqë dorë nga shërbimi baritor, pasi e njofton
për arsyet e kësaj kërkese dhe pasi dëgjon me vëmendje arsyet e tij, në një dialog
vëllazëror”. “Kardinajtë – krerë dikasteri në Kurien Romake dhe kardinajtë e tjerë,
që kryejnë detyra me emërim papnor, njëlloj, sapo të mbushin moshën 75 vjeç, duhet
t’i paraqesin dorëheqjen Papës, i cili, pasi vlerëson çdo gjë, vendos”. “Krerët
e dikastereve të Kuries Romake, që nuk janë kardinaj, sekretarët dhe ipeshkvijtë,
që kryejnë detyra me emërim papnor – përfundon ‘Rescriptum’ – nuk e kryejnë më atë
detyrë me të mbushur 75 vjeç; anëtarët (e Kuries), kur mbushin moshën 80 vjeç; gjithashtu,
ata që i përkasin një dikasteri për shkak të një detyre tjetër, duke mos e kryer më
këtë detyrë, nuk janë më as anëtarë (të dikasterit)”.