Legjionarët e Krishtit: Kushtetuta e re, shenjë e mëshirës së Zotit.
Selia e Shenjtë ka miratuar këtyre ditëve Kushtetutën e re të Kongregatës rregulltare
të Legjionarëve të Krishtit, duke përfunduar kështu procesin e shndërrimit e të ripërtëritjes
e saj, nisur më 2010 me mandatin e Benediktit XVI e vijuar nga Papa Françesku, pas
largimit më 2006 të themeluesit Marcial Maciel, autor i akteve teje të rënda e skandaloze,
si abuzimi me të mitur. Atë Maciel vdiq pastaj në vitin 2008. Teksti i Kushtetutës
së re është rezultat i një pune të gjatë, që u mbyll me Kapitullin e jashtëzakonshëm
të përgjithshëm, mbajtur në janar e shkurt të këtij viti. Bëhet fjalë për një etapë
të rëndësishme renovimi përmes konsultimeve e reflektimeve që zgjatën gati tre vjet,
me pjesëmarrjen e të gjithë rregulltarëve të Kongregatës së Legjionarëve, siç njofton
zëdhënësi i Kongregatës, atë Benjamin Clariond. “Të gjithë ne Legjionarët e Krishtit
kemi pasur rastin të marrim pjesë e ta themi mendimin tonë se si e perceptojmë këtë
dhuratë të Shpirtit, që kemi marrë ne dhe Kisha përmes nesh, që është edhe karizma
jonë. Kjo shpjegohet mirë edhe në Kushtetutë, qëllimi i së cilës është mbrojtja dhe
zhvillimi i karizmës që ka Kongregata e Legjionarëve, në shërbim të Kishës e të popullit
të krishterë”.