Bektashinjtë kremtojnë Hashuren, martirizimin e Imam Husejnit
Besimtarët bektashinj festojnë sot ditën e Hashures, një ndër festat më të rëndësishme
të kësaj bashkësie fetare. Festa e Harushes kujton martirizimin e Imam Husejnit. Sipas
bektashinjve, Imami u rrethua në shkretëtirën e Qerbelasë 1400 vite më parë dhe u
vra së bashku me një numër të madh besimtarësh të tjerë për të shpëtuar Fjalën e vërtetë
të Zotit dhe Islamin. Festa e Hashures vjen pas 10 ditësh agjërimi gjatë të cilave
besimtarët bënë përgatitjen shpirtërore për përkujtimin e kremtimin e kësaj ngjarjeje. Kryegjyshi
Botëror i Bektashinjve myslimanë, Baba Edmond Brahimaj uroi të gjithë besimtarët e
bëri thirrje të vihen në qendër të jetës dashuria mes njëri-tjetrit, si dhe lutja
për më shumë paqe në këtë botë të trazuar nga luftërat. “Me këtë rast uroj dhe bekoj
të gjithë besimtarët myslimanë bektashinj në 31 vende të botës, por edhe të të gjithë
besimeve të tjera. Të kemi më shumë paqe, besim e dashuri për njëri-tjetrin. Të kthejmë
sytë nga Zoti. Për Atë kemi shumë nevojë. Paqja e shpëtimi i Zotit qofshin për të
gjithë ata që sakrifikojnë e luftojnë për njerëzimin”, u shpreh Kryegjyshi Botëror,
Baba Edmond Brahimaj.