Святы Пасад зацвердзіў новую Канстытуцыю Легіянераў Хрыста
Кангрэгацыя па справах
Інстытутаў кансэкраванага жыцця і Таварыстваў апостальскага жыцця зацвердзіла 16 кастрычніка
2014 г. новую Канстытуцыю манаскай супольнасці Легіянераў Хрыста. Дакумент ужо ўступіў
у сілу. Аб гэтым стала вядома 1 лістапада 2014 г. У спецыяльным паведамленні члены
супольнасці выказалі сваю падзяку Бэнэдыкту XVI і Францішку, а таксама папскаму дэлегату,
кардыналу Веласіа дэ Паолісу, за чатырохгадовы працэс абнаўлення. Яго мэтай быў пошук
харызмату кангрэгацыі, спрашчэнне нормаў, забеспячэнне ажыццяўлення ў ёй паўнамоцтваў
у адпаведнасці з Кананічным правам, а таксама фарміраванне ўсіх яе членаў да адказнасці.
Новая Канстытуцыя значна карацейшая за папярэднюю і налічвае толькі 235 артыкулаў,
замест 872. Іспанскі тэкст складае 110 старонак. Апостальская місія супольнасці заснавана
на навучанні Яна Паўла II з адгартацыі “Vita consecrata”. Структура кіравання была
больш адаптавана да Кодэксу кананічнага права. У дакуменце гарантуецца свабода сумлення
праз вольны доступ да духоўных кіраўнікоў і спаведнікоў, якімі не павінны быць настаяцелі.
Канстытуцыя дае толькі агульнае ўяўленне аб пашане адносна жанчын, дзяцей і падлеткаў.
У паведамленні адзначаецца, аднак, што нядаўна былі выдадзены іншыя больш падрабязныя
дакументы кангрэгацыі аб прадухіленні злоўжыванняў у гэтай сферы.
Новыя правілы
з’яўляюцца юрыдычным тэкстам, таму не звяртаюцца да жыцця заснавальніка Легіянераў
Хрыста. Аўтары паведамлення нагадваюць, аднак, што ў выказваннях Святога Пасаду выразна
аддзяляецца харызмат супольнасці ад амаральных учынкаў, якія здзейсніў памерлы ў 2008
г. кс. Марсіаль Масьель.