Në fshatin Leskoc të Klinës, një qendër e re Karitasi në shërbim të të varfërve
Kisha katolike e Kosovës, me ndihmën e Karitasit italian Umbria – Toscana, realizoi
një qendër e re Karitasi në fshatin Leskoc të Klinës. Në ceremoninë e përurimit morën
pjesë ipeshkvi i vendit, imzot Dodë Gjergji, ipeshkvi i Karitasit Umbria –Toscana
imzot Benedetto e personalitetë tjera. Më hollësisht nga Prishtina të ndjekim shërbimin
e Mrikë Ibrajt..... Shumë
qytetarë të Anadrinisë me 27 tetor u mblodhën në fshatin Leskoc për t’ju bashkuar
gëzimit me rastin e përurimit të një qendre të re të KARITAS-it Italian ‘Umbria Toskana’,
më në krye imzot Benedetto, mori pjesë edhe KFOR-i Italian. Përurimin e bënë ipeshkvi
i Kosovës Imzot Dodë Gjergji bashkë me ipeshkvin mysafir italian imzot Benedetto e
kryetarin e Komunës së Klinës, Sokol Bashota. Imzot Dodë Gjergji, tha me këtë
rast se nëse mbretëron paqja në zemrat tona e në rrethin tonë, atëherë ne kemi aftësi
për të bërë diçka të mirë. “Ne falënderojmë Zotin për punën dhe ndihmën e miqve tanë
që kanë bërë dhe po bëjnë këtu në Kosovë në ngritjen e mirëqenies së këtij populli.
Falënderojmë po ashtu edhe dashamirët që janë këtu, ipeshkvin nga Italia, Imzot Benedetto
e miqtë të tjerë, që kanë kontribuar përmes organizmit të CARITAS-it, në Radulloc,
e tani edhe në Leskoc, në ndërtimin e këtij objekti madhështor. Në mënyrë të veçantë,
falënderoj kryetarin e Komunës së Klinës, Sokol Bashotën, për mbështetje morale e
materiale për këtë shoqatë dhe në përgjithësi për Kishën katolike në Klinë”, tha imzot
Dodë Gjergji, duke shtuar se dashuria në mes njëri-tjetrit ekziston, edhe pse ndonjëherë
ne nuk jemi të vetëdijshëm për këtë vlerë, e këtë më së miri e ka treguar Nënë Tereza,
e cila gjithë njerëzimit i ka treguar se ne, populli shqiptar, edhe pse i kemi mundësitë
e vogla për t’ju ndihmuar të tjerëve, dimë dhe mundemi të sakrifikohemi për ata që
janë nevojtarë. Ai u bëri thirrje të gjithë njerëzve vullnetmirë që të kontribuojnë
për këtë objekt madhështor që ka një mision humanitar. Ndërkaq kryetari i Komunës
së Klinës, Sokol Bashota, u shpreh me fjalë miradije për ndihmesën e KARITAS-it Italian,
i cili hap mundësinë e përkujdesjes se familjeve që trokasin në këtë derë, e sidomos
për fëmijët me nevoja të veçanta të Komunës së Klinës. Kryetari Bashota, udhëheqësin
e KARITAS-it Italian, Masimo Mazzalin e ka nderuar me mirënjohje me motivacion: “Për
kontributin e dhënë dhe bashkëpunimin e mirë të CARITAS-it me Komunën e Klinës” që
siç ka thënë me devotshmëri po e ndjek shembullin e të madhërishmes, të Lumes Nënë
Terezë. Gjithnjë nga Kartasi i Kosovës, u organizua një tryezë paqeje në Prishtinë ‘Pa
komunikim s’mund të ketë pajtim dhe paqe’, kjo është motoja e një tryeze të organizuar
me 27 tetor në Prishtinë nga Karitasi i Kosovës, ku morën pjesë ambasadorë të akredituar
në Kosovë dhe shoqëria civile. U tha me këtë rast se, Shteti i Kosovës ka arritur
të krijojë një lloj paqeje në vend, por ende ka shumë punë për t’u bërë. Komunitetet
në Kosovë kanë më shumë nevojë të komunikojnë ndërmjet vete dhe ta njohin gjuhën e
njëri-tjetrit, e sidomos brezat e rinjë. Ambasadori i Britanisë së Madhe në Kosovë,
Jan Cliff, vlerësoi se nëse nuk ka komunikim nuk mund të zhvillohen iniciativat për
pajtim dhe paqe. “Ne e kemi një lloj paqeje në Kosovë, në kuptimin e mungesës së dhunës
ushtarake, paraushtarake, por nuk mund të them se kemi shkuar shumë përpara me pajtim.
Ambasada ime e shumë të tjerë në këtë sallë janë të përfshirë në iniciativa për t’i
bërë komunitetet bashkë, për të ndihmuar me procesin e pajtimit, por më duhet të them
se ende kemi për të bërë një rrugëtim të gjatë”, tha Cliff, duke shtuar se duhet vazhduar
bisedimet Prishtinë – Beograd. Ndërsa ambasadori i Norvegjisë Jan Braathu theksoi
se ajo që i ndodh një komuniteti mund të reflektojë edhe në komunitetin tjetër. ‘‘Në
esencë të gjithë njerëzit pak a shumë veprojnë njësoj, pavarësisht a jemi në rajon,
apo kemi të bëjmë me norvegjezët, suedezët, shqiptarët apo serbët. Duhet të kemi një
humanitet të përbashkët”, u shpreh ai. Për të dy këta ambasadorë është e rëndësishme
që Kosova mos të ndjekë rrugën e Bosnje Hercegovinës. Drejtori i Karitasit të
Kosovës, don Viktor Sopi, nënvizoi se, çdoherë bëjnë përpjekje t’i afrojnë njerëzit
ndërmjet vete dhe se institucioni që ai e drejton ka për qëllim të vë në pah se çdo
njëri ka të drejtë të jetojë i lirë dhe se dinjiteti i secilit është i pacenueshëm.
“Programet tona që ngerthejnë në vetvete vetëdijesimin e njeriut, arsimimin dhe socializmin
janë të vazhdueshme e të ndryshme, por me karakter të njëjtë, kanë për qëllim ndërtimin
e paqes, pra Caritasi mundohet të jetë në shërbim të vendit”, tha don Viktor Sopi.
Ai bëri me dije edhe projektin tjetër që stimulon fuqizimin e gruas në shoqërinë tone,
duke shtuar se Caritas Kosova organizoi këtë tryezë me qëllim që të ketë një qasje
më kritike dhe më të plotë nga faktorët e ndryshëm që veprojnë në Kosovë mbi procesin
e paqes dhe pajtimit.