Mesazh i Papës për Shoqatën ndërkombëtare të Ekzorcistëve
Ekzorcistët, në shërbimin e tyre të veçantë, në bashkim me ipeshkvijtë, të tregojnë
dashurinë e Kishës për të gjithë ata, që vuajnë për shkak të të Keqit. Kështu shkruan
Papa Françesku në mesazhin, që i dërgon kryetarit të Shoqatës Ndërkombëtare të Ekzorcistëve,
atë Francesco Bamonte. Këtyre ditëve, anëtarët e shoqatës janë mbledhur në Romë për
kuvendin e tyre të parë, pas njohjes juridike nga ana e Kongregatës për Klerin, qershorin
e kaluar. 300 ekzorcistë nga e gjithë bota folën për përhapjen dhe pasojat e okultizmit,
satanizmit dhe ezoterizmit. Intervistuam për këtë psikiatrin italian Valter Cascioli,
zëdhënës zyrtar i Shoqatës: Këto praktika ua hapin rrugën veprimtarive demoniake
të jashtëzakonshme. Sigurisht, numri i njerëzve që marrin pjesë në këto praktika,
me dëme të rënda shoqërore, psikologjike, shpirtërore e morale, është në rritje e
kjo na shqetëson, sepse, si pasojë, kemi edhe rritjen e veprimtarisë demoniake të
jashtëzakonshme, sidomos ngacmimet, ankthet e mbi të gjitha, pushtimin e shpirtit
nga ana e djallit. A mos nënvleftësohen rreziqet që vijnë nga ushtrimi i këtyre
praktikave? Nganjëherë, po. Nganjëherë, vetë veprimtaria demoniake e zakonshme
– si tundimet – nuk merret shumë parasysh nga ata, që kanë fe të dobët. Ne këshillojmë
më shumë vigjilencë. Jetojmë në një çast historik veçanërisht kritik, kur nxitimi,
mbetja në sipërfaqen e gjërave, individualizmi i tejskajshëm, shekullarizimi, duket
sikur mbizotërojnë në shoqëri. Lufta kundër së keqes e kundër dreqit të mallkuar po
kthehet gjithnjë e më tepër në emergjencë. Kjo varet, përveçse nga veprimi i drejtpërdrejtë
i armikut të Zotit, edhe nga dobësimi i fesë, mosrespektimi i rregullave, pra mungesa
e vlerave, dhe nga relativizmi kulturor, tashmë tepër i përhapur. Nga ana tjetër,
bombardohemi me mesazhe mediatike, me libra, programe televizive e kinematografike,
që në një farë mënyre, në vazhdën e sensacionalizmit e të spektakularizimit, i nxisin,
sidomos brezat e rinj, të merren me okultizëm, satanizëm e nganjëherë, edhe t’i praktikojnë. Nga
përvoja e ekzorcistëve, çfarë sulmon më shumë djalli sot? Dinakëria e tij shprehet
në faktin se na bën të besojmë se nuk ekziston. Laicizmi i përhapur në shoqërinë tonë
nuk na ndihmon. Problemet janë gjithnjë po ato: dobësimi i fesë, por të bën përshtypje
ndikimi i këtyre fenomeneve të veprimtarisë demoniake të jashtëzakonshme sidomos mbi
brezat e rinj e mbi familjet. E dimë se ai që përçan – djalli – jo vetëm na ndan nga
Zoti, por ndan njerëzit, familjet; na ndan edhe nga realiteti, sepse, nganjëherë,
ndeshemi me gjendje tjetërsimi mendor, pasojë e veprimtarisë demoniake të jashtëzakonshme.