Пантыфік адзначыў веліч Бэнэдыкта XVI і нагадаў пра адказнасць чалавека за прыроду
Папа Францішак прыняў
удзел у цырымоніі адкрыцця скульптурнага бюста Бэнэдыкта XVI, 27 кастрычніка 2014
г. Ён быў устаноўлены ў Папскай акадэміі навук на знак пашаны да Пантыфіка на пенсіі
і яго ўкладу ў развіццё навукі. “Бэнэдыкт XVI – вялікі Папа. Вялікі дзякуючы сіле
і праніклівасці свайго розуму, дзякуючы свайму значнаму ўкладу ў тэалогію, сваёй любові
да Касцёла і людзей, сваім цнотам і рэлігійнасці”, сказаў падчас цырымоніі Святы Айцец.
У мерапрыемстве прынялі ўдзел шматлікія ватыканскія іерархі і навукоўцы, сярод якіх
Нобелеўскія лаўрэаты, якія з’яўляюцца членамі Папскай акадэміі навук. Францішак нагадаў,
што Бэнэдыкт XVI глыбока ўсведамляў “важнасць навукі для сучаснай культуры”. “Ніколі
нельга казаць, што вучоба і навука асушылі яго асобу і яго любоў да Бога і бліжняга,
але наадварот, навука, мудрасць і малітва абагацілі яго сэрца і дух”, - сказаў Святы
Айцец.
Цырымонія адкрыцця бюста Пантыфіку на пенсіі прайшла ў рамках заканчэння
штогадовай пленарнай сесіі Папскай акадэміі навук, прысвечанай тэме эвалюцыі і прыроды.
У сувязі з гэтым папа Францішак нагадаў пра рызыку разумення Бога ў якасці “чараўніка,
які з дапамогай чароўнай палачкі здольны ствараць усе рэчы”. Бог, ствараючы істоты,
надзяляў іх унутраным законам, паводле якога могуць развівацца і дасягаць сваёй поўні,
сказаў Папа. Тэорыя “вялікага выбуху”, на яго думку, не супярэчыць боскаму творчаму
ўмяшанню “таму што эвалюцыя прадугледжвае стварэнне істотаў, якія эвалюцыянуюць”.
Чалавек,
быў надзелены поўнай свабодай і адказнасцю за стварэнне, адзначыў Пантыфік. Таму навукоўцы,
асабліва хрысціянскія, пакліканы клапаціцца аб будучыні чалавецтва і зямлі, бараніць
іх і ліквідаваць пагрозы, давяраць схаванаму ў эвалюцыйных механізмах патэнцыялу прыроды
і дапамагаць спаўненню Божай задумы: будаванню света, добрага для цялеснага і духоўнага
жыцця; свету для ўсіх людзей, а не толькі для прывелеяваных груп або класаў, лічыць
Святы Айцец.