Papa takon Presidentin e Ugandës, konfliktet në Afrikë në qendër të bisedimeve
Sot para dite në Vatikan, Papa Françesku priti në audiencë Presidentin e Ugandës,
Yoweri Museveni, me bashkëshorten dhe delegacionin shoqërues. Konfliktet që kanë prekur
zona të ndryshme të Afrikës, qenë ndër argumentet kryesore të bashkëbisedimeve të
Papa Françeskut me Presidentin e Republikës së Ugandës, Youweri Kaguta Museveni. Gjatë
takimit u përmenden “marrëdhëniet e mira ndërmjet Selisë së Shenjtë e Republikës së
Ugandës, me një referim të veçantë për kontributin themelor të Kishës katolike dhe
bashkëpunimin me institucionet edukative, shoqërore e shëndetësore. Më tej, u nënvizua
rëndësia e bashkëjetesës paqësore ndërmjet komponentëve të ndryshme shoqërore e fetare
të Vendit”. Së fundi, “u shqyrtuan edhe disa çështje me karakter ndërkombëtar,
me një vëmendje të veçantë për konfliktet që interesojnë disa pjesë të Afrikës”. Pas
bisedimeve me Papa Françeskun, Presidenti Ugandës u takua me Sekretarin e Shtetit
të Vatikanit, kardinali Pietro Parolin, shoqëruar nga Sekretari për Marrëdhëniet me
Shtetet, imzot Mamberti. Gjatë momentit të shkëmbimit të dhuratave, duke marrë
nga Papa Françesku kopjen e enciklikës “Evangelii Gaudium”, Presidenti tha “do ta
lexojë menjëherë e nëse do të vini në Ugandë do të mund të flasim së bashku”. Nga
ana e tij Presidenti Museveni i dhuroi Papës librin e tij fotografik mbi Ugandës me
titullin “Lufta për liri e demokraci”, e Papa e Presidenti e shfletuan librin duke
komentuar së bashku. Papa Françesku i dhuroi Presidentin medaljen e paqes e siç thamë
një kopje të enciklikës “Evangeliii Gaudium”. Duke i prezantuar tekstin Presidentit,
Papa Bergoglio insistoi mbi faktin se është fjala për “një libër mbi fenë, mbi ndërgjegjen
sociale e mbi varfërinë”, e përmendi disa herë të varfrit.