Ватыканскі іерарх: у Касцёле няма палітычнай дэмакратыі ці рэвалюцыі
Прэфект Кангрэгацыі
Веравучэння, кардынал Герхард Людвіг Мюлер лічыць, што Сінод Біскупаў на тэму сям'і,
які нядаўна завершыў свае працы ў Ватыкане, быў надзвычайным не толькі ў сваім назове,
але таксама і ў чаканнях ад яго. “Розныя СМІ з усяго свету інфармавалі аб будучай
рэвалюцыі ў Касцёле. Але ў Касцёле няма палітычнай дэмакратыі, як сказаў Бэнэдыкт
XVI, таму не можа быць рэвалюцыі ў агульнапрынятым сэнсе гэтага слова”, - сказаў нямецкі
пурпурат. Паводле іерарха ў Касцёле на самым пачатку здзейснілася вялікая рэвалюцыя,
аўтарам якой быў Езус Хрыстус. “Гэтая рэвалюцыя мае за свой цэнтр Бога і яна ніколі
не страціць на сваім значэнні”, - падкрэсліў ён.
Кардынал Мюлер назваў Сінод
“рэвалюцыяй Любові супраць граху і эгаізму”, што як ён патлумачыў, азначае “культуру
жыцця, а не смерці”. Па словах прэфекта Кангрэгацыі Веравучэння, “усё заснавана на
пытанні, ці мы прымаем новае жыццё. Усё жыццё – гэта дар ад Бога, і мы павінны яго
паважаць і прымаць”, - сказаў кіраўнік ватыканскай дыкастэрыі.