Удзельнік Сінода: праблема з перадачай веры ў сям’і становіцца глабальнай
Кардынал Крыстаф Шонборн
лічыць, што падчас ІІІ Надзвычайнай сесіі Сінода Біскупаў увага звярталася ў большай
меры на праблемы сужэнскіх пар, а не сем’яў. “Шмат казалася пра пары, сакрамэнт сужэнства,
але мала пра чалавечую, сацыяльную, культурную рэальнасць сям’і... бацькоў, сыноў,
бабуль і дзядуль – усю сетку, якая складае сям’ю”, - сказаў ён ў інтэрв’ю інтэрнэт-парталу
www.rossoporpora.org. “У наш час ёсць праблема, асабліва на Захадзе: мы шмат гаворым
супраць індывідуалізма, але самі таксама жывем ім, унутры сябе. Існуе тэндэнцыя бачыць
пару, толькі з яе некаторымі вузкімі праблемамі. Падчас Сінода было звернута мала
ўвагі на праблемы звязаныя з працай, эканамічнай сітуацыяй сем’яў, важнасцю плённага
ўзаемнага абмену паміж пакаленнямі. Папа часта нагадвае пра бабуль і дзядуль – запрашаў
іх на плошчу св. Пятра. Гэта паказвае, што сям’я складаецца не толькі з бацькоў і
дзяцей, але прынамсі з трох-чатырох пакаленняў”, - сказаў ён.
На думку пурпурата
падчас Сінода Біскупаў увага была засяроджана на некаторых вузкіх тэмах. Напрыклад
шырока абмяркоўвалася магчымасць удзялення св. Камуніі для разведзеных, якія ўступілі
ў несакраментальныя саюзы, але зусім не ішла гаворка пра разбурэнне сувязі паміж сем’ямі,
якая адбываецца ў выніку распаду сужэнства. “Развод ударае не толькі па пары, але
ў першую чаргу па дзецям і ўсёй сямейнай сетцы”, нагадаў ён.
Кардынал Шонборн
лічыць, што пра пытанні перадачы веры ў сям’і падчас Сінода казалася недастаткова.
“У той жа час існуе шмат бацькоў, якія пакутуюць па прычыне таго, што не могуць перадаць
веру сваім дзецям. Гэта праблема вельмі распаўсюджаная на Захадзе, і не толькі. Я
размаўляў на гэту тэму таксама з мусульманамі і пераканаўся, што і яны маюць цяжкасці
ў гэтай сферы. Гэта выклік, які становіцца глабальным”, - адзначыў аўстрыйскі пурпурат.
Кардынал Шонборн лічыць важным правядзенне Сінода Біскупаў менавіта на тэму
сям’і, асабліва ў актуальны перыяд, калі здзейсняецца шмат нападаў на гэты інстытут.
“Паставіць сям’ю, а не толькі пару ў цэнтр увагі ўсяго Касцёла – гэта заданне, фундаментальны
выклік для будучыні нашага грамадства”, адзначыў ён.