Papa për FAO-n: uria në botë, “jo” spekullimeve në emër të zotit të përfitimit
Për të zhdukur urinë në botë nuk mjafton ndihma nga jashtë, duhen ndryshuar politikat
e zhvillimit e rregullat e tregut: kështu shkruan Papa në një mesazh për drejtorin
e përgjithshëm të Organizatës Botërore për Ushqimin e Bujqësinë (FAO), porf. José
Graziano da Silva, me rastin e Ditës së djeshme Botërore të Ushqimit. Ati i Shenjtë
kërkon që të mos spekullohet me çmimet, thjesht për t’iu bindur zotit të fitimit.
Kujton miliona njerëz, të cilëve u mungon buka e përditshme, ndërsa Perëndimi hedh
sasi të jashtëzakonshme ushqimesh, për të mos ulur çmimin e shitjes së tyre. Është
një dramë e vërtetë, nënvizon Papa, para së cilës jemi shpesh të pafuqishëm, por edhe
indiferentë, të paaftë të ndjejmë mëshirë për dhimbjen e të tjerëve, a thua se nuk
kemi aspak përgjegjësi për këtë. “Për të zhdukur urinë – shkruan Ati i Shenjtë
– nuk mjafton të gjejmë zgjidhje për mungesat e fatkëqinjve, ose të ndihmojmë me ushqime
e fonde ata, që jetojnë në gjendje emergjence. Duhet të ndryshojmë paradigmën e politikave
të ndihmës e zhvillimit, të ndryshojmë rregullat ndërkombëtare për prodhimin dhe tregtinë
e produkteve bujqësore, duke u garantuar vendeve, në të cilat bujqësia është baza
e ekonomisë dhe e mbijetesës, vetëvendosjen për tregun bujqësor”. “Deri kur –
e ngre zërin Papa Françesku – do të vazhdojmë të mbrojmë sisteme prodhimi dhe konsumi,
që përjashtojnë pjesën më të madhe të popullsisë botërore, edhe nga thërrimet që bien
përtokë nga tryeza e të pasurve? Ka arritur koha të mendojmë e të veprojmë, duke u
nisur nga çdo njeri e çdo bashkësi e jo nga tregu. Për rrjedhojë, duhet të ndryshojë
edhe mënyra e kuptimit të punës, objektivat dhe veprimtaria ekonomike, prodhimi ushqimor
dhe mbrojtja e ambientit. Ndoshta, kjo është e vetmja mundësi për të ndërtuar paqen
e vërtetë në të ardhmen, e cila sot, kërcënohet edhe nga pasiguria ushqimore”.