Պօղոս Զ Քահանայապետի երանացումի պատրաստութիւնները Հռոմի թեմի կողմէ։

(Ռ.Վ. 16 հոկտեմբեր 2014) Ի պատրաստութիւն Պօղոս Զ Քահանայապետի երանացման ծիսակատարութեան, զոր կը հանդիսապետէ ֆրանչիսկոս Քահանայապետը` կիրակի 19 Հոկտեմբեր 2014-ին առաւօտեան, ս. Պետրոս հրապարակի վրայ, Հռոմի թեմը` 18 Հոկտեմբերին կը նախատեսէ աղօթքի հսկում մը երեկոյեան ժամը 7,30-ին, Հռոմի Սափիենցա պետական համալսարանին մէջ, երիտասարդ համալսարանականներու մասնակցութեամբ եւ նախագահութեամբ Հռոմի տեղապահ արքեպիսկոպոս` կարդինալ Ակոսդինօ Վալլինիի։ Հռոմի եկեղեցին կազմակերպած է ապա այլ խորհրդածական ձեռնարկներ նուիրուած Պօղոս Զ` ''Ճովաննի Պաթիսդա Մոնթինիի'' անձին ու անոր քահանայապետութեան։ Նշենք որ Պօղոս Զ Քահանայապետը 1920-1922 յաճախած էր Հռոմի համալսարանի գրականութեան մասնաճիւղը, եւ 1923-1925 եղած է մատրանապետը` (հոգեւոր հայրը) իտալական կաթողիկէ համալսարանական դաշնակցութեան։
Ուրբաթ եւ շաբաթ օրերուն նախատեսուած են երկու գիտաժողովներ Ալեսանտրինա եւ Անթոնեանում մատենադարաններուն մէջ` ''Մոնթինի եւ Հռոմի համալսարանականները'' նիւթին մասին։
Յայտնենք որ Մոնթինի մեծապէս կը հետաքրքրուէր մշակոյթով եւ մասնաւորապէս ֆրանսական կաթողիկէ մշակոյթով։ Որպէս Քահանայապետ ան միշտ աշխատած էր հաշտեցնել կաթողիկէութիւնը ժամանակակից մշակոյթին հետ։
Կիրակի 19 Հոկտեմբեր, ս. Պետրոս հրապարակի վրայ ֆրանչիսկոս Քահանայապետը պիտի գլխաւորէ երանացման պատարագը բազմաթիւ կարդինալներու ու եպիսկոպոսներու մասնակցութեամբ։ Ծիսակատարութեան ընթացքին փակումը պիտի կատարուի նաեւ ընտանիքի եպիսկոպոսական արտակարգ սիւնհոդոսին, որուն աշխատանքները սկիզբ առին 5 Հոկտեմբերին եւ որուն նիւթն է ''Ընտանիքի հովուական մարտահրաւէրները աւետարանութեան շրջագիծէն ներս''։