Паслядэбатная справаздача выклікала гарачую дыскусію на Сінодзе
Паслядэбатная справаздача
(Relatio post disceptationem), прадстаўленая 13 кастрычніка 2014 г., на думку многіх
удзельнкаў Сінода, добра адлюстравала меркаванні, якія прагучалі ў сінадальнай зале
на мінулым тыдні. У дакуменце ясна гучыць галоўная думка асамблеі пра любоў Касцёла
да сям’і і яго здольнасць быць побач з чалавекам у любы момант яго жыцця, гаворыцца
ў паведамленні Залы Друку Святога Пасаду. Падчас абмеркавання справаздачы, сінадальныя
айцы звярнулі ўвагу, што гаворачы пра сужэнствы, якія перажываюць праблемы, варта
не забывацца і часцей казаць пра сем’і, што застаюцца вернымі вучэнню Евангелля, і
дзякаваць ім за іх сведчанне. Сінод павінен з большай дакладнасцю і яснасцю казаць
аб сужэнстве непарыўным, шчаслівым, верным назаўсёды, прысутным у грамадскім жыцці.
Іншыя прапановы датычылі неабходнасці надання большай увагі пытанню жанчын, іх аховы
і значэнню для перадачы жыцця і веры.
Сінадальныя айцы заклікалі да паглыблення
і ўдакладнення тэмы “класіфікацыі”, якая можа быць крыніцай блытаніны. Калі, напрыклад,
гаворка ідзе пра доступ да сакрамэнтаў асоб, якія развяліся і ўступілі ў новыя саюзы,
было падкрэслена, што цяжка прыняць выключэнні, таму што, на самай справе, яны могуць
стаць агульным правілам.
Было таксама заўважана, што слова “грэх” у справаздачы
амаль адсутнічае, што нараджае рызыку падпарадкавання менталітэту гэтага свету. Неабходна
ўважлівасць у рыторыцы адносна асоб гомасексуальных, каб не стварыць уражанне станоўчай
ацэнкі гэтай арыентацыі з боку Касцёла, гаварылася ў сінадальнай зале. Такую ж асцярожнасць
варта захаваць у адносінах да сітуацыі людзей, якія жывуць у нефармальных саюзах.
Адносна спрашчэння працэдуры прызнання несапраўднасці сужэнства, была выказана
занепакоенасць у сувязі з прапановай перадаць больш паўнамоцтваў дыяцэзіяльным біскупам,
што можа прывесці да празмернай нагрузкі на іх.
Сінадальныя айцы заклікалі
надаваць больш увагі выпадкам палігаміі, асабліва ў кантэксце асоб, якія навярнуліся
і жадаюць прыняць сакрамэнты. Была падкрэслена неабходнасць супрацьстаяння распаўсюду
парнаграфіі, асабліва ў інтэрнэце, і яе рэальная пагроза для адзінства сям’і. Што
тычыцца адкрытасці да жыцця, удзельнікі Сінода звярнулі ўвагу на неабходнасць больш
глыбокага аналізу не толькі тэмы абортаў, але і сурагатнага мацярынства.