Nëse Kisha ndalet, sëmuret: Papa Françesku kujton misionartët në meshën e së dielës
“Dolën në udhëkryqet e botës për t’i ftuar të gjithë”: kështu i kujtoi dje Papa Françesku,
dy shenjtorët misionarë e ungjillëzues të Kanadasë, ipeshkvin Francesco de Laval dhe
orsolinen Maria e Mishërimit, lindur në Francë në shekullin e 17-të. Ati i Shenjtë
kremtoi meshën e falenderimit për kanonizimin e tyre më 3 prillin e këtij viti, duke
përshkruar jetën e themeluesve - në një farë mënyre - të Kishës Katolike në Kuebek
e duke nënvizuar faktin se ata nuk u ndalën kurrë: “Nëse Kisha
ndalet e mbyllet, sëmuret, mund të korruptohet, si nga mëkatet, ashtu edhe nga shkenca
e rreme, e ndarë nga Zoti, që është shekullarizmi i sotëm”. Misionarët janë
ata, që kanë guximin për ta jetuar Ungjillin. Misionarët kanadezë, kujtoi Ati i Shenjtë,
dolën nëpër të gjitha udhëkryqet e botës, i thirrën të gjithë dhe i bënë mirë Kishës: “Misioni
ungjillëzues i Kishës është në thelb, mesazhi i dashurisë, i mëshirës dhe i faljes
së Zotit, i cili iu zbulua njerëzve përmes jetës, vdekjes dhe ringjalljes së Jezu
Krishtit… E me këtë forcë të Zotit patën guximin për ‘të dalë’ nëpër rrugët e botës,
me besimin në Hyjin, që fton. Kështu është jeta e një misionari dhe e një misionareje…
që përfundojnë pastaj larg shtëpisë, larg atdheut; shpesh të vrarë, të mbytur! Ashtu
siç po ndodh këto ditë me shumë nga vëllezërit e motrat tona”. Kujtimi i misionarëve
na mban në këtë çast historik, kur Kisha eksperimenton mungesën e punëtorëve në vreshtin
e Zotit. Papa u lut që Kuebeku të jetë sërish burim shenjtorësh misionarë: “Ky
kujtim na ndihmoftë që të mos e braktisim sinqeritetin. Të mos e braktisim guximin!
Ndoshta… Jo, jo, ndoshta, po është e vërtetë! Djalli është ziliqar e nuk do që toka
të jetë plot me misionarë. T’i lutemi Zotit që Kuebeku të kthehet në rrugën e fryteve,
për t’i dhënë Zotit shumë misionarë. E këta të dy, që – si të thuash – themeluan Kishën
e Kuebekut na ndihmofshin si ndërmjetës. Fara që mbollën shpresojmë të rritet e të
japë frytin e shumë burrave e grave të guximshme, largpamëse, me zemrën e hapur për
thirrjen e Zotit”.