Ֆրանսացի գրող Փաթրիք Մոտիանօ արժանացաւ Գրականութեան Նոպելեան մրցանակին։
Նոպելեան մրցանակի «Թուիթըր» ընկերային ցանցին պաշտօնական էջը կը հաղորդէ, որ այս տարի
գրականութեան Նոպելեան մրցանակին արժանացած է ֆրանսացի գրող Փաթրիք Մոտիանօ: Մոտիանօ
մրցանակին արժանացած է «յիշողութեան արուեստին համար, որուն միջոցով ան նկարագրած է մարդկային
ամէնէն աներեւակայելի ճակատագիրները եւ բացայայտած կեանքը շրջափակման մէջ», կը նշուի
Նոպելեան յանձնաժողովի նամակին մէջ: Հեղինակի գիրքերուն մեծամասնութիւնը հիմնուած
է անոր կեանքին եւ Համաշխարհային Բ. պատերազմի տարիներուն Ֆրանսայի շրջափակման ժամանակաշրջանի
իրադարձութիւններուն վրայ: Մէկ օր առաջ Քիմիագիտութեան մարզին մէջ Նոպելեան մրցանակի
դափնեկիր դարձած էին Էրիք Պեթսիկ, Սթեֆըն Հել եւ Ուիլիըմ Մեռներ: Անոնք մրցանակի արժանացած
են գերֆլուորեսցենթիք մանրադիտակի մշակման համար: Այդ մեթոտով կարելի է ուսումնասիրել
կենսաբանական բջիջներու կառուցուածքը, ինչ որ կարեւոր է նոր դեղերու ստեղծման համար: 7
հոկտեմբերին բնագիտութեան մարզին մէջ Նոպելեան մրցանակի արժանացած են Իսամու Աքասաքի,
Հիրոսի Ամանօ եւ Սիուձի Նաքամուրա: Երեք գիտնականները ստեղծած են աժան կապոյտ լուսատիոտային
լամբեր, որոնք ծանօթ են կապոյտ ԼԵՏ անունով: Բնախօսութեան եւ բժշկութեան մարզին մէջ
մրցանակի արժանացած են Մայպրիթ եւ Էտուըրտ Մոզըրնըր ամոլը, ինչպէս նաեւ Ճոն Օ՛Քիֆի: Պարգեւատրման
արարողութիւնը, ըստ աւանդութեան, տեղի պիտի ունենայ 10 դեկտեմբերին` Նոպելեան մրցանակի
հիմնադիր շուէտացի գիտնական Ալֆրետ Նոպելի մահուան օրը: