Кардынал Уэле пра сітуацыю разведзеных, якія жывуць у новых саюзах
Прэфект Кангрэгацыі
па справах Духавенства, кардынал Марк Уэле, распавёў Ватыканскаму радыё, якім чынам,
на яго думку, Касцёл павінен сведчыць міласэрнасць да разведзеных, якія жывуць у новых,
несакрамэнтальных саюзах. Паводле іерарха, такія асобы, нягледзячы на складанасць
іх сітуацыі, застаюцца членамі Касцёла і не павінны ад яго аддаляцца з прычыны немагчымасці
прыняцця св. Камуніі. Сувязь з супольнасцю і прысутнасць на Эўхарыстыі з’яўляюцца
вельмі важнымі, падкрэсліў ён. Неабходна спрыяць сустрэчы з гэтымі людзьмі і даць
ім магчымасць быць пачутымі, гэта можа мець свой “тэрапеўтычны” эфект.
На
думку кардынала Уэле, Касцёлу трэба таксама заняцца сваёй мовай у адносінах да разведзеных,
якія жывуць у несакрамэнтальных саюзах. Важна пазбягаць дэкларацый наконт іх прабывання
ў стане пастаяннага смяротнага граху і немагчымасці вяртання ў стан ласкі. “Такая
мова абражае і не лічыцца з духоўным жыццём гэтых людзей, якія ў большай колькасці
выпадкаў сто разоў папрасілі прабачэння ў сваім сэрцы за першае, няўдалае сужэнства”,
сказаў пурпурат. На іх сітуацыю трэба глядзець з рэалізмам. Канешне, калі асоба на
працягу дзесяці гадоў жыве ў іншым саюзе, мае дзяцей, то яна не можа ўжо разарваць
гэтай новай сувязі. Трэба яшчэ шмат зрабіць, каб дапамагчы такім людзям заставацца
ў кантакце з Касцёлам, не адчуваць сябе асуджанымі і ўсведамляць сутнасць перашкоды
для прыняцця сакрамэнтальнай Камуніі.
Кардынал Уэле падкрэсліў, што таямніца
Эўхарыстыі носіць сужэнскі характар – яна з’яўляецца выразам вернасці Езуса аж да
самай смерці. Калі асоба жыве ў другім саюзе, яе першае, сакрамэнальнае сужэнства,
не было анулявана. Такім чынам, тут існуе аб’ектыўная супярэчнасць.
Тым не
менш, адзінства з Хрыстом для такіх людзей магчыма, адзначыў кардынал. Гаворка ідзе
пра адзінства духоўнае. Яно можа быць таксама выказана абрадава, напрыклад, жэстам
благаслаўлення падчас св. Камуніі, лічыць кардынал Уэле.