Ватыканскі кардынал супраць спрашчэння працэдур прызнання несапраўднасці сужэнства
Кардынал Рэйманд Лео
Бёрк, прэфект Найвышэйшага Трыбуналу Апостальскай Сігнатуры, не з’яўляецца прыхільнікам
спрашчэння і паскарэння працэдур, звязаных з прызнаннем несапраўднасці сужэнства.
Пра гэта ён сказаў у інтэрв’ю Ватыканскаму радыё 9 кастрычніка 2014 г. На думку амерыканскага
пурпурата, у такой важнай тэме, якая тычыцца, між іншым, збаўлення асобы, трэба, каб
“першапачатковае рашэнне пацвярджалася таксама і вышэйстаячымі інстанцыямі”. Паводле
кардынала Бёрка важную ролю ў дадзенай сферы грае таксама кваліфікацыя суддзяў. “Калі
ёсць добра падрыхтаваны персанал, гэты працэс не цягнецца доўга”, - сказаў ён.
Сінод
павінен прадэманстраваць прыгажосць сужэнства, паказаць яго як удзел у любові Айца,
і Сына, і Святога Духа, а не засяроджвацца выключна на складаных сітуацыях, лічыць
кардынал Бёрк. Пурпурат выказаў падтрымку шматлікім парам, якія спрабуюць увайсці
у “вузкую браму” сужэнства, даючы сведчанне аб яго прыгажосці.