Удзельнікі Сінода размаўлялі пра сувязь крызісу веры з крызісам сям’і
На сувязь крызісу
веры з крызісам сям’і звярталі ўвагу ўдзельнікі ІІІ Надзвычайнай сесіі Сінода Біскупаў,
падчас чарговых пасяджэнняў у Ватыкане, распавёў 8 кастрычніка 2014 г. кіраўнік Залы
Друку Апостальскай Сталіцы кс. Фэдэрыка Ламбардзі. Ён падзяліўся, што за два дні форуму
выступілі каля 70 яго ўдзельнікаў. Значная ўвага звярталася на сітуацыю вакол сям’і
ў Афрыцы, улічваючы вялікую колькасць прадстаўнікоў епіскапатаў з гэтага кантынента.
Сваім сведчаннем падзялілася сужэнская пара з Кот-д’Івуара, у якой жонка – хрысціянка,
а яе муж – мусульманін.
Адной з важных тэм была вера. Удзельнікі асамблеі нагадалі,
што яна з’яўляецца не прывязанасцю да навучання, але асабістай лучнасцю з Хрыстом.
Размова ішла пра неабходнасць даверу да Божай ласкі, пра міласэрнасць і праўду ў складаных
сітуацыях, важнасць малітвы і духоўнасці ў сямейным жыцці, а таксама прабачэння і
прымірэння.
Сінадальныя айцы падкрэслілі каштоўнасць пілігрымак да марыйных
санктуарыяў, спалучаных з малітвай аб прымірэнні і прабачэнні ў сям’і. Былі абмеркаваны
тэмы міжрэлігійнага дыялогу, дзейнасці Апостальскай Сталіцы ў міжнароднай сферы на
карысць сям’і.
У рамках асамблеі сінадальныя айцы атрымалі ў дар ад Папскай
рады па справах сям’і зборнік усіх дакументаў Святога Пасаду на тэму сям’і і чалавечага
жыцця, паведаміў кс. Ламбардзі.