Kardinali Sistach: Sinodi dëshiron të tregojë bukurinë e familjes
Dita e dytë e Sinodit për Familjen në Vatikan. Sot, diskutimet u përqendruan në dy
tema kryesore: “Ungjilli i familjes dhe ligji natyror”, si edhe “Familja e thirrja
e njeriut në Krishtin”. Presidenti delegat
i turnit, kardinali Luis Antonio Tagle, kryeipeshkvi i Manilës, paraqiti çiftin filipinas,
që merr pjesë si dëgjues në Sinod. 46 e 47 vjeç, George e Cynthia Campos, kanë lënë
punën për të shërbyer në shoqatën “Çiftet për Krishtin” së bashku me katër fëmijët
e tyre. Cynthia tregoi se gjatë shtatzanisë së katërt i patën diagnostikuar diabet
dhe preeklampsi e i patën thënë se fëmija mund të dilte me të meta. Çifti filipinas
vendosi ta çojë deri në fund shtatzaninë e tani bija e tyre Christen është plot shëndet
e jetë. Shoqata “Çiftet për Krishtin” është e pranishme në 81 dioqeza të Filipineve
dhe ka degë në 163 vende. Por për atmosferën e punimeve të Sinodit, të dëgjojmë
intervistën me kryeipeshkvin e Barcelonës, kardinalin Lluis Martinez Sistach, i cili
në lutjen që hapi mbledhjen e parë të djeshme, nënvizoi se ipeshkvijtë e pranishëm
duhet të diskutojnë me ndjenjat e Bariut të Mirë, “që kujdeset për 99 delet e veta
e shkon të kërkojë delen e humbur, me vetëdijen se sot, në disa anë të Kishës, numri
po përmbyset”: Ne duam të paraqesim bukurinë e martesës, të familjes, si bashkim
intim i jetës në dashuri – siç na thotë Koncili II i Vatikanit – e kjo është e rëndësishme.
Mendoj se e mira e njerëzve, e shoqërisë humane e të krishterë varet shumë nga familja.
Duhet të punojmë për t’ia mësuar këtë rinisë, sepse kur martohen, ta dinë se dashuria
e tyre duhet të jetë e pjekur, për gjithë jetën, besnike dhe e frytshme. Sipas
jush, sa njihen mësimet e Kishës dhe të Shkrimit Shenjt mbi martesën e familjen? Mendoj
se nuk njihen shumë. Nuk e di pse ndodh kjo, sigurisht arsyet janë të ndryshme: njerëzit
kanë pak kohë për të studiuar, për të mësuar e dëgjuar. Besoj se pasuria e mësimeve
të Kishës për familjen, për martesën, për burrin e gruan, për dashurinë e gjithë jetës,
për bashkimin e çiftit, për hapjen ndaj jetës, për edukimin e krishterë të fëmijëve,
besoj se të gjitha këto mund t’i bëjnë të lumtur njerëzit. Pak ditë më parë kremtova
një meshë për Sinodin e Familjes e ishte aty një çift, që festonte 50-vjetorin e martesës.
Dëshmia e tyre është mesazh për rininë: impenjimi për gjithë jetën, bashkimi i pazgjidhshëm,
i bën njerëzit të lumtur, i ndihmon të realizohen. Është e mundur. Nganjëherë është
e vështirë, por jo e pamundur.