Papa: Sinodi t’i dëgjojë vështirësitë, t’i shërojë plagët. Nisin sot punimet e Sinodit mbi familjen.

Filluan sot në Vatikan punimet e Asamblesë III të Përgjithshme të Jashtëzakonshme të Sinodit të Ipeshkvijve, mbi temën e rëndësishme: “Sfidat baritore për familjen, në kuadrin e ungjillëzimit”. Etërit sinodalë, sipas Papa Françeskut duhet të kenë “dhuratën e dëgjimit”, jo vetëm “të Zotit” por edhe “të popullit”. Prandaj të jenë “të gatshëm” për një “konfrontim të sinqertë, të hapur e vëllazëror “, që “të na ndihmojnë t’i marrin mbi vete përgjegjësitë baritore të çështjeve që bart me vete ndryshimi epokal i sotëm”. “Bashkimi i jetës, pranuar nga bashkëshortët, hapja e tyre ndaj dhuratës së jetës, takimi e kujtimi i brezave, edukimi, transmetimi i fesë së krishterë tek të gjithë pa dallim e pa përjashtim” të gjendjes në të cilën ndodhën. E së fundi aftësinë ”për të shikuar gurrën e përvojës së krishterë”, nga e cila përherë “hapen udhë e mundësi të reja të paparamenduara”. Në të njëjtën kohë, Papa porosit pjesëmarrësit e sinodit, t’u shmangen ndeshjeve dhe qëndrimeve të prera e t’i shqyrtojnë me guxim edhe udhët e reja, për t’ju përgjigjur kështu problemeve baritore që ka familja në realitetin e sotëm bashkëkohor.
Sinodi i jashtëzakonshëm, që nisi sot punimet në Vatikan, është etapa e parë e një udhe që do të zgjasë deri te sinodi i rregullt vitin e ardhshëm 2015, përmes të cilit Kisha kërkon udhë të përshtatshme e orientime baritore për përballimin e sfidave të familjeve të sotme. Kujtojmë kështu shumë familje që përballen me vështirësi të ndryshme, familje të shpërbëra, familje që kanë prishur sakramentin e kurorës së martesës, që janë të divorcuara e që kërkojnë të marrin kungimin e Shenjtë të Eukaristisë gjatë Meshës, familje që janë në situata “jo të rregullta”, ato që bashkëjetojnë, besimtarë të divorcuar e që kanë krijuar familje, me probleme dhe tipare, që nuk përkojnë me kanunet e doktrinës katolike. Papa Françesku, nuk dëshiron që këto të ndjehen të përjashtuara nga Kisha. Prandaj edhe nevoja e shqyrtimit dhe e gjetjes së udhëve e të orientimeve të reja baritore, ka qenë një ndër 39 pyetjet që përmbante pyetësori, përmes të cilit në fillim të vitit është konsultuar baza katolike e mbarë botës.
Mbi këto çështje e shumë të tjera, nga dita e sotme deri më 19 tetor, do të konfrontohen 191 etërit sinodalë – kardinaj, ipeshkvij e rregulltarë – të ndihmuar nga 16 ekspertë, 39 auditorë, ndër ta edhe 13 çift të martuara e 8 delegatë të Kishave tjera: gjithsej 253 pjesëmarrës.
Papa Bergoglio kërkon një “konfrontim të hapur, të sinqertë e vëllazëror” gjatë sinodit, duke ripohuar se familja vazhdon të jetë “shkollë e pazëvendësueshme e njerëzimit, kontribut i domosdoshëm për një shoqëri të drejtë e solidare”. Kisha, nga ana saj, duhet të jetë pranë njerëzve të varfër e në vështirësi, duke treguar e transmetuar mëshirën e Hyjit, e bindur se me fuqinë e hirit të Zotit është në gjendje “t’i shërojë plagët që rrjedhin gjak, në mënyrë që të ndezë përsëri shpresën”, sepse, kujtoi Papa Françesku, “ka shumë njerëz që janë pa shpresë”.