Арцыбіскуп Кандрусевіч: Сінод будзе няпростым, але ў дыскусіях выяўляецца праўда
Правядзенне дыскусіі
на тэму сям’і вельмі своечасовае, бо заўтра размаўляць аб гэтым можа быць ужо позна,
адзначыў арцыбіскуп Тадэвуш Кандрусевіч, Мітрапаліт Мінска-Магілёўскі ў інтэрв’ю Ватыканскаму
радыё. Іерарх будзе прадстаўляць Беларусь на ІІІ Надзвычайнай сесіі Сінода Біскупаў,
якая пройдзе ў Ватыкане 5-19 кастрычніка 2014 г. Падчас яе будуць абмяркоўвацца пытанні
душпастырства сем’яў, сітуацыя католікаў, якія жывуць у несакрамэнтальных саюзах,
змешаных сем’яў, сексуальнай маралі, перадачы веры. “Паводле мяне, гэта будзе няпросты
Сінод: падчас яго сутыкнецца вялікая колькасць розных меркаванняў. Мне здаецца, што
будуць вельмі гарачыя дыскусіі, але яны павінны прывесці да пазнання праўды, таму
што праўда выяўляецца менавіта падчас дыскусій і спораў”, - сказаў іерарх.
Арцыбіскуп
Кандрусевіч нагадаў, што апошняя Надзвычайная сесія Сінода Біскупаў праходзіла больш
за 30 гадоў таму, а пасля яе, св. Ян Павел ІІ напісаў фундаментальны для душпастырства
сем’яў дакумент, Апостальскую адгартацыю “Familiaris consortio”, якім Касцёл працягвае
карыстацца ў нашыя дні. Сёння, аднак, свет змяняецца і ўзнікае шмат новых праблем
і выклікаў: напрыклад, многія людзі, якія называюць сябе веруючымі католікамі, не
заўсёды прытрымліваюцца Божага закону і прынцыпаў здаровай сям’і.
“Гэта праблема
вельмі актуальная, што пацвердзіла апытанне ўсіх біскупскіх канферэнцый свету. Трэба
нешта рабіць. З аднаго боку нельга змяняць навучання – яно застаецца заўсёды тым жа
самым – але пра яго прымяненне, магчыма, трэба і падумаць, у сувязі з выклікамі часу”,
- адзначыў ён.
Мітрапаліт Мінска-Магілёўскі падкрэсліў, што надзвычайная сесія
Сіноду з’яўляецца этапам падрыхтоўкі да звычайнай, якая пройдзе ў наступным годзе.
Зараз, на яго думку, задача заключаецца ў тым, каб “паставіць дыягназ” – прааналізаваць
у якой сітуацыі знаходзіцца Касцёл, якія меркаванні ў ім існуюць і на падставе гэтага
грунтоўна падрыхтавацца да Сінода Біскупаў, які пройдзе ў 2015 г.