Traktat i devocionit të vërtetë për Marinë: “Të vërtetat themelore të devocionit të
Marisë” par. 68
Papa Françesku na fton të lutemi për Sinodin e familjeve, që do të fillojë me meshën
e kremtuar nga vetë Ati i Shenjtë në Sheshin e Shën Pjetrit, këtë të dielë. E meqë
jemi në muajin e Rruzares, Papa kërkon të lutemi me anë të saj. Për t’ju ndihmuar
në këtë lutje, vijojmë shfletimin e veprës “Traktat i devocionit të vërtetë për Marinë”,
shkruar nga Shën Luigji Maria Grignion de Monfort, kapitulli “Të vërtetat themelore
të devocionit të Marisë”. Paragrafi 68 na shpjegon se ne jemi të krijuar në Krishtin
për vepra të mira. Kujtojmë se Zoja na çon gjithnjë tek Biri i saj, gurra ku ushqejmë
fenë tonë në Zotin. Pra, Jezu Krishti, Shëlbuesi ynë, Hyj i vërtetë e njeri i vërtetë,
duhet të jetë qëllimi i fundit i të gjitha devocioneve tona. E kjo është e vërteta
e parë për të cilën flet shën Luigji. Sot, e dyta.
68. E vërteta e dytë. Duhet
të përfundojmë, duke nisur nga vendi që zë Jezu Krishti në ne e duke kuptuar se nuk
i përkasim vetvetes, por, siç thotë Apostulli, krejtësisht Atij, si gjymtyrë të tij
e skllevër të tij, që ai i bleu jashtëzakonisht shtrenjtë, me çmimin e gjakut të vet. Para
pagëzimit, i përkisnim djallit, si skllevër të Tij. Pagëzimi na bëri skllevër të vërtetë
të Jezu Krishtit, që duhet të jetojnë, të punojnë e të frytojnë për këtë Zot Njeri,
duke e lumnuar në korpin tonë e duke e bërë të mbretërojë në shpirtin tonë, sepse
jemi plaçka e tij e luftës, populli e trashëgimi i tij. Për këtë arsye, Shpirti Shenjt
na krahason: 1. me drurët e mbjellë përgjatë rrjedhës së hirit, në arën e Kishës,
që duhet të japin fryte në kohën e duhur; 2. me shermendët e hardhisë, që kanë
për cungë Jezusin e duhet të japin shumë fryte; 3. me grigjën, që ka për bari Jezu
Krishtin e duhet të shumohet e të japë qumësht; 4. me tokën pjellore, që punohet
nga Zoti, në të cilën fara shumëfishohet e prodhon tridhjetë, gjashtëdhjetë ose njëqind
për një. Jezu Krishti e mallkoi fikun shterp, e dënoi shërbëtorin e padobishëm, që
nuk e shfrytëzoi si duhet talentin. Gjithë kjo do të thotë se Jezusi dëshiron të marrë
ndonjë fryt nga ne, nga vetjet tona mjerane, domethënë, veprat e mira, që ato t’i
përkasin vetëm Atij: “Të krijuar në Krishtin për vepra të mira”(Ef 2,10). Këto fjalë
të Shpirtit Shenjt dëshmojnë se Jezu Krishti është fillesa e vetme e duhet të jetë
edhe caku i vetëm i veprave tona të mira, ashtu edhe se duhet t’i shërbejmë jo vetëm
si shërbëtorë të paguar, por si skllevër dashurie. Në paragrafin 69 e 70, të cilat
mund t’i ndiqni nesër në faqen tonë të internetit , shën Luigji shpjegon çdo të thotë
kjo, pra ç’do të thotë te jemi me vetëdije “skllevër të Krishtit”, për hir të dashurisë
që kemi për të.