Papa: shëlbimi është vetëm në Jezusin, jo në ligjet e shumta të njerëzve
Të besojmë në Jezusin, mbartës i një mesazhi, që shëlbon njerëzimin e të gjithë kohrave,
apo të strehohemi në një shpëtim, fryt i “udhërimeve të njeriut”. Kjo është dilema,
për të cilën foli sot Papa Françesku, në meshën e mëngjesit. Dëshira e vetme
e Zotit është shpëtimi i njerëzimit, por shpesh janë vetë njerëzit, që duan të vendosin
rregullat e tyre e të mos ndjekin urdhërimet e Tënzot. Ky paradoks dramatik, që ndeshet
në faqet e Biblës, arrin kulmin në ngjarjet me protagonist Krishtin. Papa mori shkas
nga pjesa ungjillore ku Jezusi shpreh keqardhjen për mospranimin e njerëzve të vet,
në çastin kur judenjtë i kthejnë shpinën. “Nëse në Tir e në Sidonë do të kishin ndodhur
mrekullitë, që ndodhin mes jush – thotë Ai në Korazin e në Betsaidë - do të ishin
kthyer prej kohësh në udhën e Hyjit”. Kjo është rezistenca e krerëve të popullit,
të cilët patën vrarë profetët para Jezusit, vuri në dukje Ati i Shenjtë, e tani bëjnë
të njëjtën gjë me vetë Krishtin: “Është pikërisht klasa drejtuese, ajo që ia
mbyll dyert mënyrës me të cilën dëshiron të na shpëtojë Zoti. Kështu kuptohen debatet
e ashpra të Jezusit me klasën drejtuese të kohës së tij: grinden, e vënë në provë,
i ngrenë kurthe për të parë nëse bie në to, sepse kjo është rezistenca kundër shëlbimit.
Jezusi u thotë: ‘Unë nuk ju kuptoj! Jeni si fëmijët: i ramë flautit e nuk kërcyet;
ju vajtuam e nuk derdhët lot. Po çfarë doni?’; ‘Duam të shpëtojmë sipas mënyrës sonë!’.
Gjithnjë, po ato dyer të mbyllura për mënyrën e Zotit”. Papa Françesku e dalloi
këtë sjellje nga ajo e popullit besimtar, i cili e kupton dhe e pranon shëlbimin,
që sjell Jezusi. Për krerët, nënvizoi Ati i Shenjtë, ky shëlbim vjen nga ndjekja e
613 rregullave të ligjit, krijuar nga “ethet e tyre intelektuale e teologjike”: “Ata
nuk besojnë në mëshirën e në faljen: besojnë në flijimet. ‘Mëshirë dua, jo holokauste’.
Besojnë në gjërat e sistemuara mirë, të gjitha të qarta. Kjo është drama e rezistencës
ndaj shëlbimit. Edhe ne, secili prej nesh, e ka këtë dramë brenda. Por do të na bëjë
mirë ta pyesim veten: si dua të shëlbohem? Sipas mënyrës sime? Sipas ndonjë përshpirtërie,
që është e mirë, më bën mirë, por është e fiksuar, e qartë e s’ka rrezik? Apo sipas
mënyrës hyjnore, pra, në udhën e Jezusit, që na befason gjithnjë, që na hap dyert
e misterit të Gjithpushtetit të Zotit, i cili është mëshirë e falje?”. Kjo
dramë, vijoi Papa Françesku, është në zemrën tonë. E gjithnjë duhet të reflektojmë
kur na qëllon ta ngatërrojmë lirinë me autonominë: “Besoj se Jezusi është Mësuesi,
që na tregon udhën e shëlbimit, apo shkoj gjithandej për të marrë me qera ‘guru’,
që më mësojnë ndonjë tjetër? Dua një rrugë të sigurtë, apo strehohem nën çatinë e
rregullave e të urdhërave të shumtë, vendosur nga njerëzit? E kështu e ndjej veten
të sigurtë e me këtë lloj sigurie… ‘e blej’ shëlbimin, që Jezusi e jep falas, me bujarinë
e Zotit. Duhe t’ia bëjmë vetes këto pyetje. E fundit: unë, a i rezistoj shpëtimit,
që vjen prej Jezusit?”.