Papa: familja është pasurim, të vlerësohen eksperiencat e ndryshme
Papa Françesku kërkon vlerësimin e familjes si pasurim e thesar baritor dhe bashkëpunimin
e ipeshkvijtë me to. T’u kushtohet “vëmendje” rritjes e lulëzimit të “eksperiencave
interesante” – të fejuarve, qifteve, prindërve që kujdesën përkohësisht për fëmijët
e të tjerëve, familjeve të impenjuara në fushën sociale e në politikë, - të pranishme
në Evropës. Gjithçka të bëhet me “shpirtin e përvujtërisë e të dialogut të sinqertë”.
Kështu u tha mes tjerash Papa Françesku pjesëmarrësve të asamblesë plenare të Këshillit
të konferencave ipeshkëvnore të Evropës (CCEE), gjatë audiencës së mbajtur sot paradite
në sallën e Konçistorit në Vatikan. Kujtojmë se Asambleja e ipeshkvijve evropianë
që filloi punimet dje ka për temë “Familja dhe e ardhmja e Evropës”. Kjo asamble,
komentoi Ati i Shenjtë, është “rast i çmueshëm për të reflektuar së bashku se si mund
të vlerësohet familja, si thesar e burim i çmueshëm për përtëritjen baritore”. “Më
duket më rëndësi – shtoi Papa – që barinjtë shpirtëror dhe familjet të punojnë së
bashku, me përvujtëri e dialog të sinqertë, në mënyrë që bashkësitë kishtare të famullive
të bëhen “familja e familjeve”. Papa në vijim përmendi edhe lulëzimin e eksperiencave
interesante “brenda Kishave vendore të veçanta, eksperienca që meritojnë vëmendje
e vlerësim për një rritje të frytshme të bashkëpunimit”, e citoi: “të fejuarit që
jetojnë seriozisht përgatitjen e tyre për martesë; qiftet e martuar që pranojnë fëmijët
e të tjerëve në besim të përkohshëm apo në adoptim; grupet e familjeve në bashkësitë
famullitare apo në lëvizjet kishtare që ndihmojnë njëra-tjetrën në udhën e jetës e
të fesë. Ka edhe eksperienca tjera të ndryshme në veprimtarinë baritore të familjeve
dhe impenjime në politikë e shoqëri në mbështetje të familjeve, si të atyre familjeve
që jetojnë jetën martesore të rregullt, si edhe ato që janë të përshkuara nga problemet
apo prishjet”. “Është e rëndësishme – porositi Papa – t’i konsiderojmë e shqyrtojmë
mirë këto eksperienca domethënëse të pranishme në jetën e burrave e grave të kohës
sonë”, duke pasur mirëkuptim ndaj familjeve në përgjithësi e në mënyrë të veçantë
ndaj atyre që janë vështirësi.