Papa, emigrantëve të mbijetuar në Lampeduzë: evropianët duhet të hapin portën e zemrës
Dje pasdite, nga ora 16.30 në orën 17.00, në një dhomë pranë Sallës së audiencave
të përgjithshme “Pali VI”, Papa Françesku priti një delegacion emigrantësh të mbijetuar
nga mbytja e barkës, me të cilën kishin marrë rrugën për në Itali, më 3 tetor 2013.
Në grupin, që u takua me Atin e Shenjtë, ishin edhe disa familjarë të të mbyturve,
që – po e kujtojmë - arritën shifrën 368 vetë. 37 emigrantët e delegacionit, të
gjithë eritreas, ardhur në Romë nga vende të ndryshme të Evropës, ku jetojnë tashmë,
ndodhen në Itali pikërisht për të përkujtuar 1-vjetorin e ngjarjes së tmerrshme, e
cila nuk mund të mos u çojë ndërmend shqiptarëve Tragjedinë e Otrantos, nëse jo për
tjetër, për ngjashmërinë. Papa Françesku iu drejtua i mallëngjyer të pranishmëve,
me fjalët: “Mezi ju flas, sepse nuk di çfarë t’ju them. Ndjej gjëra që s’mund
të tregohen, sepse s’ka fjalë për të treguar sa keni vuajtur. Kjo mund të kundrohet
vetëm në heshtje, me lot për faqe, duke kërkuar rrugën për t’ju qëndruar afër”. Ati
i Shenjtë u bëri thirrje më pas evropianëve, që të hapin portat e zemrës para këtyre
njerëzve, që ikin nga vende në luftë e në gjendje të vështirë ekonomike: “Jeta
e personave, të cilëve u duhet të emigrojnë, është e rëndë e, për ata që arrijnë më
në fund në ndonjë port, i cili duket i sigurtë, dalin vështirësi të mëdha, porta të
mbyllura, shpesh nuk dinë ku të shkojnë. Por ka shumë njerëz, këtu në Itali, që e
mbajnë zemrën hapur për ju. Porta e zemrës është më e rëndësishme në ato çaste! U
kërkoj të gjithë burrave e grave të Evropës t’i hapin portat e zemrës”. Njëri
nga refugjatët i kërkoi Atit të Shenjtë mbështetje e përkrahje, sidomos për identifikimin
e kufomave. Një tjetër i foli Papës në gjuhën e vet, një tjetër akoma e falenderoi
për ndihmën, që u jep emigrantëve dhe refugjatëve. E Ati i Shenjtë u tha: “Jam
afër jush, lutem për ju, lutem për ato dyer të mbyllura, që të hapen. E gjithçka imja
është juaja. Dua ta ndjeni këtë mikpritje, që nuk është vetëm imja, por e shumë njerëzve,
që ju duan. Mos dyshoni, ne jemi pranë jush”. Papës iu dhurua një skulpturë
hekuri, që pasqyron një shishe në det, e cila ka brenda një familje. Delegacioni u
formua nga Komiteti “3 tetori”, i kryesuar nga Tareke Brhane e shoqërohej dje nga
Lëmoshtari papnor, imzot Konrad Krajewski e nga ish-kryetari i Qendrës “Astalli” të
jezuitëve, atë Giovanni Lamanna. Këto ditë është paraqitur një projektligj për
ta caktuar 3 tetorin si “Dita e kujtimit të viktimave të detit”. Disa nga të pranishmit
kanë bërë, me këtë rast, provën e ADN-së për njohjen e disa prej kufomave, akoma të
paidentifikuara.