Старшыня Папскай рады па справах свецкіх пра Сінод Біскупаў
Сінод Біскупаў з’яўляецца
магчымасцю для сумеснага разважання над пытаннем, як абвяшчаць Евангелле ў свеце,
што прапануе ўзоры жыцця радыкальна супярэчныя яму, лічыць кардынал Станіслаў Рылка.
Старшыня Папскай рады па справах свецкіх падкрэсліў, што хрысціянскім сужонкам патрэбна
“мужнасць прарокаў”, каб ісці супраць плыні пануючай культуры і прадэманстраваць,
што сужэнства з’яўляецца прыгожай і прывабнай праграмай жыцця. Іерарх выказаў перакананне,
што асноўным момантам дыскусіі на Сінодзе не будзе сітуацыя разведзеных, якія жывуць
у несакрамэнтальных саюзах, аб чым зараз актыўна гавораць СМІ. На самой справе, гаворка
ідзе пра абарону самай глыбокай сутнасці быцця чалавека, створанага Богам як мужчына
і жанчына.
Кардынал Рылка лічыць, што каталіцкія сужонкі павінны паставіць
перад сабой фундаментальныя пытанні: ці ў іх ёсць смеласць цалкам даверыцца “Евангеллю
сям’і” і навучанню Касцёла аб сужэнстве; ці нягледзячы на свае абмежаванні і слабыя
бакі, яны імкнуцца сведчыць аб прыгажосці сужэнства і хрысціянскай сям’і ў сваім асяроддзі?
Гэта важна ў кантэксце разбуральнай дыктатуры постмадэрнізма.
Ватыканскі іерарх
нагадаў, што св. Ян Павел II, якога Францішак называе “Папам сям’і”, гаварыў, што
Евангелле не абяцае нікому камфортнага жыцця і што, каб быць збаўленым, трэба ўзяць
на сябе крыж. Таму, варта “закасаць рукавы”, лічыць старшыня Папскай рады. Іерарх
перакананы, што існуе неабходнасць у дбайным абнаўленні і пераасэнсаванні ўсяго душпастырства
сям’і.
У інтэрв’ю італьянскай „Avvenire” кардынал нагадаў, што Касцёл пакліканы
суправаджаць, з любоўю і спачуваннем, хрысціянскія пары, асабліва тыя, якія перажываюць
крызіс або жывуць у несакрамэнтальных саюзах. Ён зацытаваў папу Францішка, які лічыць,
што сёння патрэбна “місійнае душпастырскае навяртанне, якое не можа пакінуць рэчы
так, як яны выглядаюць сёння”.