Да пазбягання “тэатральнага
плачу” заклікаў папа Францішак падчас ранішняй Эўхарыстыі ў Ватыкане 30 верасня 2014
г. Святы Айцец пахіліўся над гісторыяй біблійнага Ёва, які праклінаў дзень, калі нарадзіўся,
таму што “быў падвергнуты выпрабаванню – згубіў сям’ю, усе даброты, здароўе, а яго
цела стала адной вялікай язвай”. У гэты момант цярплівасць Ёва скончылася і ён пачаў
казаць Богу кепскія рэчы. “Ён прызвычаіўся казаць праўду, і гэта было праўдай пра
тое, што ён адчуваў у той момант”, - адзначыў Пантыфік. Францішак нагадаў, што і Езус
абураўся падчас малітвы ў Аліўным садзе: “Ойча, чаму мяне пакінуў?”. “Я часта чуў,
як людзі ў складаных сітуацыях, якія шмат згубілі або адчувалі сябе самотнымі і пакінутымі,
задавалі гэта пытанне: “чаму?”. Яны паўставалі супраць Бога, а я ім казаў: “Працягвай
маліцца такім чынам, таму што гэта малітва. І Езус маліўся, калі казаў свайму Айцу:
“Чаму мяне пакінуў?”, - адзначыў Папа.
Паводле Францішка, маліцца – азначае
стаяць ў праўдзе перад Богам і менавіта так рабіў Ёў – “ён не мог маліцца інакш”.
У падобных драматычных сітуацыях сёння знаходзіцца шмат людзей. Дастаткова ўзгадаць
пра хрысціян Блізкага Усходу, якіх прымусілі пакінуць свае дамы і застацца без нічога,
пра старых, хворых і самотных.
Францішак падкрэсліў, што многія хрысціяне
абураюцца на Бога па прычыне дробязяў. “Калі адчуваюць крыху цемры ў душы, лічаць
сябе мучанікамі і перастаюць маліцца”, або кажуць: “Я раззлаваўся на Бога і не пайду
на Імшу!”. У моманты цяжкасцяў трэба браць прыклад са св. Тэрызы ад Дзіцятка Езуса,
якая часта прасіла ў Бога сілы, каб “увайсці ў цярпенне”. “Наша жыццё занадта лёгкае,
а слёзы – тэатральныя”, - сказаў Папа і параіў памятаць пра сапраўдныя пакуты, якія
існуюць у свеце.