Кастрычніцкі графік сустрэч і мерапрыемстваў папы Францішка
У наступным месяцы
Святы Айцец правядзе ў Ватыкане шэраг важных сустрэч і мерапрыемстваў. У суботу, 4
кастрычніка 2014 г., у вігілію адкрыцця ІІІ Надзвычайнай сесіі Сіноду Біскупаў, якая
будзе прысвечана пытанням сям’і і сужэнства, папа Францішак прыме ўдзел у малітоўным
чуванні ў інтэнцыі паспяховага правядзення гэтага форума. 12 кастрычніка ён сустрэнецца
з вялікай дэлегацыяй пілігрымаў з Квебеку, якія прыбудуць у Рым з нагоды св. Імшы
падзякі за кананізацыю двух святых, заснавальнікаў мясцовага Касцёла: Францішка дэ
Лаваля і Марыі ад Уцелаўлення. Літургія пройдзе ў ватыканскай базыліцы і стане кульмінацыяй
пілігрымкі па месцах звязаных з жыццём гэтых святых, якая распачнецца 6 кастрычніка
ў парыжскім касцёле Сен-Жэрмэн-дэ-Прэ, дзе ў 1658 годзе св. Францішак дэ Лаваль атрымаў
біскупскае пасвячэнне.
У нядзелю, 19 кастрычніка, Святы Айцец узначаліць Эўхарыстыю
на заканчэнне ІІІ Надзвычайнай сесіі Сіноду Біскупаў. Падчас яе адбудзецца беатыфікацыя
папы Паўла VI.
20 кастрычніка Пантыфік прыме ўдзел у кансісторыі, на якім будуць
разглядацца пытанні звязаныя з кананізацыяй некаторых благаслаўлёных.