Սուրբ Էջմիածնի մէջ միջազգային գիտաժողով «Քրիստոնէութիւն, ազգ, քաղաքակրթութիւն» խորագրով

Գարեգին Բ Ծայրագոյն Պատրիարք Ամենայն Հայոց Կաթողիկոսի օրհնութեամբ եւ Մայր Աթոռ Սուրբ Էջմիածնի Թանգարանների նախաձեռնութեամբ Մայր Աթոռ Ս. Էջմիածնում` «Վաչէ եւ Թամար Մանուկեան» Մատենադարանում, սեպտեմբերի 26-27-ին տեղի կ'ունենայ «Քրիստոնէութիւն, ազգ, քաղաքակրթութիւն» թեմայով միջազգային գիտաժողով:
Գիտաժողովին, որն անցկացւում է ԵՀԽ Հայաստանեան միջեկեղեցական բարեգործական Կլոր սեղան հիմնադրամի աջակցութեամբ, մասնակցում են ներկայացուցիչներ Հայաստանից, Գերմանիայից, Աւստրիայից, Բելառուսից եւ Իսլանդիայից:
Գիտաժողովի ընթացքին մասնակիցների կողմից կը տրուեն պատասխաններ հետեւեալ հարցերին`
ա. Ին՞չ տեղ եւ նշանակութիւն ունեն քրիստոնէութեան մէջ Հայրենիք, Ազգ, Լեզու գաղափարները:
բ. Մերօրեայ կեանքում արդեօք հարկաւո՞ր է հաւատարիմ մնալ քրիստոնէական քաղաքակրթութեանը:
գ. Եկեղեցին եւ քրիստոնէական մշակոյթն այսօր ինչպէ՞ս են նպաստում քրիստոնեայ անհատի աշխարհընկալման եւ արարչաստեղծ բնութեան հանդէպ նրա վերաբերմունքի ձեւաւորմանը:
դ. Քրիստոնէութիւնը եւ հանդուրժողականութիւնը մերօրեայ հասարակութեան կեանքում:
Գիտաժողովի շրջանակներում նաեւ տեղի են ունենալու ցուցահանդէսներ Նորարար փորձառական արուեստի կենտրոնում` նշեալ երկրներից ժամանած արուեստագէտների մասնակցութեամբ, ինչպէս նաեւ Փ. Թերլեմեզեանի անուան գեղարուեստի պետական քոլեջում, որտեղ ներկայացուելու են ուսանողների ստեղծագործութիւնները` «Քրիստոնէութիւն, ազգ, քաղաքակրթութիւն» թեմայով:
Գիտաժողովի բացումը տեղի կ'ունենայ սեպտեմբերի 26-ին, ժամը 10.00-ին: