Праект рэформы ватыканскіх СМІ будзе падрыхтаваны да наступнай вясны
У працэсе рэфармавання
ватыканскіх медыярэсурсаў, разам з увядзеннем сучасных тэхналогій, будуць улічвацца
патрабаванні карыстальнікаў традыцыйных СМІ, распавёў лорд Крыстафер Патэн, былы брытанскі
палітык і дырэктар “BBC”, цяперашні кіраўнік Камісіі па ватыканскіх СМІ, створанай
для падрыхтоўкі праекта іх больш рацыянальнага і эфектыўнага выкарыстання. “Усе мы,
як хрысціяне і католікі, усведамляем цудоўнае пасланне Касцёла – пасланне прымірэння,
любові, надзеі, духоўнай шчодрасці. Мы адказныя за яго перадачу. Канешне, першымі
ў гэтых шэрагах стаяць прафесійныя журналісты і тыя, хто ім дапамагае тут, у Ватыкане”,
- адзначыў ён.
Крыстафер Патэн перакананы, што ватыканскія СМІ павінны крочыць
у нагу з тэхналагічным прагрэсам, але таксама лічыцца з традыцыйнымі сродкамі камунікацыі.
Ён нагадаў, што ў некаторых рэгіёнах свету да сённяшняга дня вялікая колькасць насельніцтва
атрымлівае інфармацыю з дапамогай кароткіх радыёхваляў і гэты аспект павінен улічвацца.
“Мы павінны гарантаваць, каб цудоўнае евангельскае пасланне, якое Каталіцкі Касцёл
можа прапанаваць, перадавалася такім чынам, каб найбольш эфектыўна дасягаць моладзі,
бедных і іншых групаў”, - сказаў медыяэксперт у інтэрв’ю Ватыканскаму радыё.
Гаворачы
пра фінансавы бок рэформы, лорд Патэн адзначыў важнасць рацыянальнага выкарыстання
існуючых і далёка небясконцых ватыканскіх рэсурсаў. “Гаворка ідзе пра тое, каб станавіцца
больш эфектыўнымі. Няма нічога кепскага ў спробе Касцёла выкарыстоўваць ахвяраванні
вернікаў больш эфектыўным чынам”, - падкрэсліў ён.
Крыстафер Патэн плануе прадставіць
праект рэформы высокім ватыканскім іерархам да наступнай вясны. Перад гэтым, камісія,
якую ён узначальвае, будзе кансультавацца як з прадстаўнікамі ватыканскіх СМІ, так
і з адрасатамі іх паслання: епіскапатамі, ватыканістамі, вернікамі.