Papa: të mos jemi të krishterë mburravecë, si flluskë sapuni
Të largohemi nga mburrja e kotësia, që na e zbeh të vërtetën e na bën të fryhemi si
flluskë sapuni. Kjo, tema kryesore e predikimit të Papës Françesku në meshën e mëngjesit,
në Shtëpinë e Shën Martës në Vatikan. Ati i Shenjtë, duke marrë shkas nga Libri i
Kishtarit, leximi i parë i liturgjisë së sotme, nënvizoi se edhe kur bëjnë mirë, të
krishterët nuk duhet “të duken”. Jezusi, kujtoi
Papa, i kritikonte shumë ata, që mburreshin. Dijetarëve të ligjit u thoshte të mos
ecnin shesheve, me veshje luksoze, si të ishin princa. Kur të luteni, thotë Zoti,
mos e bëj vetëm e vetëm që të shohin të tjerët, por shko në dhomën tënde e lutu në
fshehtësi. E njëjta gjë vlen edhe për ata, që ndihmojnë të varfërit. Jezusi i këshillon
të mos bëjnë bujë sa herë u hedhin nevojtarëve ndonjë kacidhe, por ta bëjnë këtë pa
u dukur, sepse Ati Qiellor sheh edhe në fshehtësi: “Por mburraveci të përgjigjet:
‘Shiko këtu, unë po e jap këtë çek për veprat e Kishës’ e, ta tregon çekun; pastaj,
nga ana tjetër, e mashtron Kishën. Këtë bën mburraveci: jeton për t’u dukur. ‘Kur
agjëron – u thotë Zoti këtyre – të lutem mos u bëj melankolik, si i trishtuar, sepse
të gjithë e kuptojnë se po agjëron; jo, agjëro me gëzim; bëj pendesë me gëzim, që
askush të mos e kuptojë’. Por, kështu është kotësia: jetë sa për t’u dukur, që të
shohin të tjerët”. Të krishterët, që jetojnë kështu, vijoi Papa Françesku,
sa për t’u dukur e për t’u mburrur, duken si palloi, që hap bishtin. Dikush thotë
“unë jam i krishterë, jam kushëri me filan prift, me filan murgeshë, me filan ipeshkëv…familja
ime është e krishterë”. Por, mburren për këtë! E Papa pyeti: “Pa më thuaj, si është
jeta jote me Zotin? Si lutesh? Si u bën mirë të tjerëve? A i viziton të sëmurët? Thuaj
të vërtetën”. Jezusi na thotë ta ndërtojmë shtëpinë, pra, jetën tonë të krishterë,
mbi shkëmb, mbi të vërtetën, ndërsa mburravecët e ndërtojnë shtëpinë mbi rërë. Kur
ajo bie, edhe jeta e krishterë lëkundet, pasi njerëz të tillë nuk janë në gjendje
t’u rezitojnë tundimeve: “Sa të krishterë jetojnë për t’u dukur. Jeta e tyre
duket si flluskë sapuni. E bukur, flluska e sapunit! I ka të gjitha ngjyrat! Por zgjat
një sekondë e pastaj? Kur shohim ndonjë varrim, të na shkojë ndërmend se këto gjëra
janë kotësi, sepse në të vërtetë, ne do të kthehemi në tokën nga kemi ardhur, siç
thoshte Shërbëtori i Zotit Pali VI. Na pret dheu, kjo është e vërteta përfundimtare.
Ndërkaq, çfarë bëj: mburrem, apo përvesh mëngët? A bëj mirë? A e kërkoj Zotin? A lutem?
Këto janë gjërat e rëndësishme. Ndërsa mburrja është gënjeshtare, imagjinare, gënjen
vetveten, e gënjen mburravecin, i cili, në fillim, shtiret, por pastaj e beson edhe
vetë gënjeshtrën e vet. E beson vërtet. I shkreti!”. Kjo ndodhi me Herodin,
siç tregon Ungjilli i sotëm, i cili e pyeste me ngul veten, kush ishte Jezusi. Kotësia
ta heq qetësinë shpirtërore, theksoi Papa. Është njëlloj si njerëzit, që lyhen pak
si tepër për t’u zbukuruar e pastaj, kanë frikë të dalin në shi, sepse u fshihet buzëkuqi.
Vetëm e vërteta na e jep paqen, nënvizoi Ati i Shenjtë, e jo kotësia e mburrja. Papa
kujtoi tundimet e djallit për Jezusin në shkretëtirë. Sa bukur ia paraqiti, tha Françesku:
“Hajde me mua, të japim shfaqje; ti hidhu, engjëjt të shpëtojnë, e të gjithë do të
besojnë në Ty”. Kotësia, mburrja është sëmundje shpirtërore shumë e rëndë e aspak
e lehtë për t’u zbuluar: “Etërit egjiptianë në shkretëtirë thoshin se kotësia
është tundim, kundër të cilit duhet të luftojmë gjithë jetën, sepse kthehet përherë
për të na larguar nga e vërteta. E që të kuptohej kjo thoshin: është si qepa, ti e
merr e fillon ta qërosh. Kështu edhe me kotësinë, hiq një shtresë sot, një tjetër
nesër e, gjithë jetën qëron shtresat e kotësisë si qepën, por era të mbetet në dorë
ama. T’i kërkojmë Zotit hirin për të mos qenë mburravecë, por të vërtetë, me të vërtetën
e realitetit e të Ungjillit”.