Արամ Ա. Եւ Ս. Էջմիածինը կը դատապարտեն Տէր Զօրի եկեղեցւոյ ականահարումը

ԵՐԵՒԱՆ.- Մեծի Տանն Կիլիկիոյ Արամ Ա. կաթողիկոս, որ հովուապետական այցով կը գտնուի Յունաստան, խստօրէն դատապարտած է Տէր Զօրի Սրբոց Նահատակաց հայկական եկեղեցւոյ ականահարումը: Ըստ վեհափառ հայրապետին հասած տեղեկութիւններուն՝ Հայկական Ցեղասպանութեան նահատակներու յիշատակին նուիրուած սոյն եկեղեցիին, անոր կից գործող թանգարանին ու համալիրին ականահարումը ծրագրաւորուած ոճիր էր. այս մասին հաղորդուած է Կիլիկիոյ կաթողիկոսութենէն:
«Հայոց Ցեղասպանութեան 100րդ տարելիցի շեմին եւ Հայաստանի անկախութեան 23րդ տարեդարձին օրը կատարուած այս ոճիրը, ըստ մեզի՝ բարբարոսական արարք է: Այդ ոճիրին ետին կանգնածները թող իմանան, որ մեր նահատակներուն յիշատակը եւ յանուն արդարութեան մեր ժողովուրդի պայքարը խորհրդանշող Տէր Զօրը՝ որպէս Հայոց Ցեղասպանութեան նահատակներու սրբավայր, կարելի չէ բնաջնջել մեր ժողովուրդի հաւաքական յիշողութենէն», ըսած է Արամ Ա. կաթողիկոս:
Մայր աթոռ Ս. Էջմիածինը եւս խստօրէն դատապարտած է Սրբոց Նահատակաց եկեղեցւոյ ականահարումը՝ ըսելով. «Հայոց Ցեղասպանութեան նահատակների մասունքներն ամփոփող եկեղեցու աւերումը անարգալից քայլ է հայ ժողովրդի եւ նրա սուրբ նահատակների յիշատակի հանդէպ: Տեղի ունեցածն անթաքոյց դրսեւորում է Հայոց Ցեղասպանութեան 100ամեայ տարելիցի յիշատակութեան շրջանակներում՝ հարուածելու հայ ժողովրդի պահանջատիրական արդար ձգտումներին: Կատարուածն անմարդկային բարբարոսութիւն է եւ չի կարող արդարացուել որեւէ կրօնի կամ գաղափարախօսութեան կողմից, որ հիմնուած է աստուածապաշտական եւ մարդասիրական արժէքների վրայ»: