Папа шкадуе, што кітайскія біскупы не могуць свабодна прыехаць у Ватыкан
Пантыфік заклікаў
біскупаў паставіць жыццё і служэнне на службе “місійнаму навяртанню”, якога сёння
чакае Божы народ і ў цэнтры якога знаходзіцца “місійнае служэнне Касцёла чалавецтву”
па прыкладзе Хрыста, Які абмыў ногі сваім вучням. Касцёл пакліканы скарачаць адлегласць
паміж людзьмі, выдаляць прыніжэнне, прымаць чалавечае жыццё, і таму “мае патрэбу ў
пастырах, якія ведаюць, як стаць на калені перад іншымі, каб абмыць ім ногі”, адзначыў
Святы Айцец Францішак. Ён сустрэўся 20 верасня 2014 г. у Ватыкане з біскупамі, якія
ўдзельнічалі ў рымскім семінары, арганізаваным Кангрэгацыяй Евангелізацыі Народаў.
Паводле Папы, сёння біскуп павінен быць “побач з людзьмі”, адзначацца айцоўствам і
лагоднасцю, цярплівасцю і міласэрнасцю, беднасцю, прастатой і аскетызмам. “Будзьце
ўважлівымі да вашых святароў, клапаціцеся пра кансэкраванае жыццё, любіце бедных”,
- заклікаў Пантыфік іерархаў.
Францішак прызнаўся, што яго мара, каб кітайскія
біскупы, якія атрымалі пасвячэнне ў апошнія гады, прысутнічалі на такіх сустрэчах.
Хоць гэта пакуль не магчыма, “у глыбіні душы” Пантыфік спадзяецца, “што не за гарамі
той дзень”. Ён запэўніў кітайскіх біскупаў у сваёй салідарнасці і папрасіў іх не адчуваць
сябе пакінутымі і адзінокімі.
Папа нагадаў, што Касцёл прабывае ў гэтыя дні
ў фазе падрыхтоўкі да Сіноду Біскупаў на тэму сям’і, і папрасіў іерархаў аб малітве
ў гэтай інтэнцыі. “Сем’і з’яўляюцца асновай у справе евангелізацыі, з сваёй адукацыйнай
місіяй і актыўным удзелам у жыцці парафіяльнай супольнасці”, - сказаў Святы Айцец.
Ён заклікаў біскупаў “спрыяць душпастырству сем’яў, уважліва ставіцца да іх, суправаджаць
і навучаць, дзякуючы чаму яны зробяць свой лепшы ўклад у жыццё Касцёла і грамадства”.