Ватыканская дыпламатыя нагадала ў ААН пра правы карэнных народаў
Сацыяльныя, асабістыя
і духоўныя патрэбы 370 мільёнаў прадстаўнікоў карэнных народаў у 90 краінах ва ўсіх
рэгіёнах свету здаўна хвалююць Святы Пасад, падкрэсліў падчас 27-й сесіі Савета па
правах чалавека ААН арцыбіскуп Сільвана Тамазі. Ватыканскі дыпламат 17 верасня 2014
г. у Нью-Ёрку нагадаў меркаванне Апостальскай Сталіцы, што усе магчымыя міжнародныя
ініцыятывы павінны быць натхнёныя прынцыпам павагі да самабытнасці і культуры карэнных
супольнасцяў, улічваць іх традыцыі, вераванні і здольнасць вырашаць самастойна свой
лёс у супрацоўніцтве з нацыянальнымі ўладамі.
У той жа час, правы чалавека
і асноўныя свабоды карэнных народаў на жаль працягваюць парушацца, адзначыў прадстаўнік
Святога Пасаду ў ААН, у тым ліку шляхам сістэмнай дыскрымінацыі і адчужэння ад палітычнай
і эканамічнай улады, адсутнасці належнага доступу да правасуддзя і адукацыі, праз
войны і экалагічныя катастрофы. Больш за тое, часта абаронцы правоў карэннага насельніцтва
падвяргаюцца пераследу і рэпрэсіям. Арцыбіскуп Тамазі нагадаў пра негатыўныя і разбуральныя
наступствы для карэнных народаў дзейнасці транснацыянальных карпарацый, перш за ўсё,
у здабываючых галінах.
Іерарх звярнуў таксама ўвагу на пытанне абароны інтэлектуальнай
уласнасці на культурную і фальклорную спадчыну карэннага насельніцтва.
Прадстаўнік
Святога Пасаду прапанаваў прамое ўключэнне карэннага насельніцтва “у працэсы прыняцця
рашэнняў, звязаных з кіраваннем прыроднымі рэсурсамі на іх тэрыторыі”, “ліквідацыю
любых спроб яго маргіналізацыі”, гарантаванне “яго законных патрабаванняў у сацыяльнай
і культурнай сферах, галіне аховы здароўя”, “прымірэнне паміж карэннымі народамі і
супольнасцямі, у якіх яны жывуць”.