Irak. Patriarku Sako: nuk duhen bombat, por mandati i OKB-së
Patriarku kaldeas i Bagdadid, Louis Raphael I Sako dha dje këtë porosi: në krizën
irakiane nevojitet mandati i OKB-së e jo vetëm sulmi nga ajri. Patriarku u shpreh
kështu pasi, për herë të parë që nga fillimi i sulmeve ajrore, avionët amerikanë qëlluan
në afërsi të Bagdadit. Sulmet ajrore amerikane kundër të të vetëshpallurit Shtet Islamik
kanë nisur në fillim të gushtit, ndërsa të hënën, gjatë një konference ndërkombëtare
në Paris u forcua fronti i koalicionit kundër forcave islamike. Vendet anëtare të
këtij koalicioni kërkuan të luftohet “me çdo mjet të nevojshëm” kundër kërcënimit
global të ushtrisë islamike, “përfshirë ndihmën e duhur ushtarake”. Patriarku Sako
Shpjegoi para mikrofonit të Radio Vatikanit rëndësinë e mandatit të OKB-së:
Po,
sepse është shumë e rëndësishme. Nuk mund të shkohet e të bombardohet kështu, verbërisht...
Do të vriten shumë njerëz dhe njerëzit që gjenden aty e bombardohen nuk janë me Is-in.
Për këtë arsye duhet gjetur një zgjidhje më e përshtatshme, për t’ua kursyer jetën
njerëzve në vend, për të mos shkatërruar infrastrukturat e shtëpitë... Prandaj, mendoj
se mandati i OKB-së do të ishte shumë i rëndësishëm. Unë kërkova që edhe vendet arabe
të bënin diçka, sepse ata e njohin gjendejn tonë, kulturën tonë, gjuhën tonë. Ata
mund të negociojnë me Is-in, pa bërë luftë.
Çfarë keni për të thënë më
tej lë lidhje me krizën irakiane?
Nevojiten trupa nga toka, jo vetëm bombardime,
sepse bombardimet nuk janë zgjidhja. Besoj se është e nevojshme të ndihmojmë edhe
ushtrinë irakiane e ushtrinë kurde, për të siguruar mbrojtje të vërtetë, me qëllim
që njerëzit të mund të kthehen në shtëpitë e veta. Pra, duhen mbështetur të dy këto
procese.
Iraku është goditur nga eksponentët e të të ashtuquajturit Shteti
Islamik, por jo vetëm: kemi edhe zonën e Sirisë. Pra, kemi të bëjmë me një konflikt
që i kapërcen kufijtë e Irakut...
Po: konflikti është më i gjerë se Iraku.
Pastaj, duhet ta pyesim veten: këto grupe fundamentaliste, kush i financon, kush i
mbështet, prej nga vijnë? Ata përbëjnë rrezik në vetvete, prandaj, në vend që të ndryshojmë
regjimet këndej e andej, duhet gjetur një zgjidhje për këto grupe, të cilët përbëjnë
vërtet një sfidë për mbarë botën.
Ju gjendeni në Evropë. Sot jeni në Bruksel,
për të kërkuar që OKB-ja të japë mandatin për ndërhyrje në Irak, apo jo?
Për
të paraqitur disa zgjidhje për gjendjen në Irak: kërkoj ndihma humanitare të menjëherëshme,
pastaj edhe çlirimin e këtyre fshatrave dhe mbrojtjen ndërkombëtare, për t’i ndihmuar
këta njerëz të kthehen në shtëpitë e veta.