Փարիզի խորհրդաժողովի մասնակիցները Իրաքին աջակցութիւն կը խոստանան
Փարիզի Խորհրդաժողովին մասնակից երկիրներու արտաքին գործոց նախարարները յայտնեցին, որ
օժանդակութիւնը պիտի ներառէ «զինուորական պատշաճ աջակցութիւն»: Ֆրանսայի նախագահ Ֆրանսուա
Հոլլանտ խորհրդաժողովի բացման ընթացքին յայտնեց, որ ՏԱՀԵՇ-ի զինեալներուն ներկայացուցած
վտանգը համաշխարհային հակազդեցութեան կը կարօտի: Իրաքի նախագահ Ֆուատ Մահսում, որ
Հոլլանտի հետ կը նախագահէր ժողովին, յայտնեց, որ միջազգային ընտանիքը «շուտով» պէտք է
ժիհատականները հետապնդէ: «Եթէ միջամտութիւնն ու Իրաքի աջակցութիւնը ուշանայ, ապա Իսլամական
պետութիւնը կրնայ յաւելեալ տարածքներ գրաւել եւ անոր ներկայացուցած վտանգը առաւել եւս
մեծ պիտի դառնայ»: Քանի մը ժամ ետք խորհրդաժողովը փակուեցաւ` հրապարակելով միացեալ
հաղորդագրութիւն մը, որ կը յայտնէ, թէ մասնակիցները «յանձնառու են Իրաքի նոր կառավարութեան
աջակցելու անոր պայքարին մէջ… անհրաժեշտ բոլոր միջոցներով, ներառեալ` պատշաճ զինուորական
աջակցութեամբ»: Ամերիկացի պաշտօնատարներ կը յայտնեն, որ շարք մը արաբական երկիրներ
առաջարկած են մասնակցիլ Իրաքի մէջ ՏԱՀԵՇ-ի դիրքերուն դէմ կատարուելիք օդային հարուածներուն:
Թուրքիա պիտի արտօնէ, որ իր հողերուն վրայ գտնուող ՕԹԱՆ-ի ռազմակայանները միայն մարդասիրական
եւ գումակային գործողութեանց համար օգտագործուին: Փարիզի խորհրդաժողովի նպատակը դաշինքի
անդամ իւրաքանչիւր երկրին դերակատարութեան ճշդումն էր: Առայժմ այդ դաշինքին մաս կազմած
են շուրջ 40 երկիրներ, ներառեալ` 10 արաբական երկիրներ` Եգիպտոսը, Իրաքը, Յորդանանը,
Լիբանանը, Պահրէյնը, Քուէյթը, Օմանը, Քաթարը, Սէուտական Արաբիան եւ Արաբական Միացեալ
Էմիրութիւնները: Նշենք, որ ամերիկեան օդուժը օգոստոսէն ի վեր Իրաքի մէջ ՏԱՀԵՇ-ի դիրքերուն
դէմ 160 յարձակումներ գործած է: