2014-09-09 08:26:54

Հայաստանի շուրջ 1000 գրադարաններէն կ՛օգտուի կէս միլիոն ընթերցող


ԵՐԵՒԱՆ, «Նովոստի Արմէնիա».– Հայաստանի մօտ 1000 գրադարաններու ծառայութիւններէն կ՛օգտուի շուրջ կէս միլիոն ընթերցող, իսկ գրադարանային ֆոնտին մէջ կայ շուրջ 20 միլիոն գիրք. այս մասին յայտնած է Հայկական գրադարանային միութեան քարտուղար, Խնկօ-Ապեր անուան մանկական հանրապետական գրադարանի փոխտնօրէն Մադլեն Յովսէփեանը:
«Վերջին 5-7 տարում երեխաներն ու դեռահասները կրկին սկսել են գիրք ընթերցել: Աստիճանաբար կարգաւորւում է գրադարանների գործունէութեան օրէնսդրական դաշտը», յայտնած է ան։
Ան նշած է, որ փոքր տարիքի երեխաները հեքիաթներ կը նախընտրեն, աւելի մեծ տարիքի պատանիները՝ արկածախնդրական գրականութիւն, իսկ բարձր դասարանցիները՝ գիտահանրամատչելի գրականութիւն:
«Գրքերի նկատմամբ հետաքրքրութեան աճի մասին վկայում է տեղական գրահրատարակիչների գործունէութեան ակտիւացումը: Լաւ աւանդոյթ է դարձել գրքի տօնավաճառների անցկացումը, որտեղ հրատարակիչներն ու ընթերցողները հնարաւորութիւն ունեն հանդիպել առանց միջնորդների», յայտնած է ան։
Պատասխանելով այն հարցումին, թէ համացանցը արդեօք մարդոց կեանքէն դուրս չէ՞ հանած գիրք կարդալու մշակոյթը՝ Յովսէփեան դիտել տուած է, որ համացանցը հիմնականին մէջ տեղեկատուական բնոյթ ունի եւ «ինչպէս երեխաներին, այնպէս էլ մեծահասակներին ոչինչ չի կարող փոխարինել գրքի հետ կենդանի շփումը»:
«Ցաւօք, չնայած գործադրուող ջանքերին, համայնքային եւ դպրոցական գրադարանների պայմանները բաւարար չեն: Դրանք ինչպէս գրքերի ֆոնդի, այնպէս էլ տեխնիկական միջոցների կարիք ունեն, չեն ստանում պարբերական հրատարակութիւններ եւ չեն մասնակցում տեղեկատուական բազային ստեղծմանը», դիտել տուած է Յովսէփեան։








All the contents on this site are copyrighted ©.