Ахвяраванні за папскія благаслаўленні на пергаменце – толькі на дапамогу бедным
Права прымаць заказы
на памятныя папскія благаслаўленні ў выглядзе пергаментных дыпломаў вернецца да выключнай
кампетэнцыі Апостальскай элемазінарыі, а ахвяраванні, атрыманыя за іх, будуць ісці
толькі на дабрачынныя мэты. Пра гэта гаворыцца ў лісце арцыбіскупа Конрада Краеўскага,
элемазінарыя Святога Айца, да дырэктароў шматлікіх рымскіх крамаў, з якімі ажыцяўлялася
супрацоўніцтва ў дадзенай сферы. Яшчэ ў сярэдзіне ХХ ст. многія кнігарні і ўстановы
Рыма атрымалі дазвол на прыняцце заказаў на благаслаўленні, што было выклікана адсутнасцю
фізічнай магчымасці Ватыкана задаволіць просьбы тысяч вернікаў з розных краін свету.
Зараз, з распаўсюджваннем інтэрнэта і стварэннем сайту Апостальскай элемазінарыі www.elemosineria.va,
праз які магчыма прымаць заказы, гэта праблема перастала быць актуальнай.
Арцыбіскуп
Краеўскі нагадаў, што заданне Апостальскай элемазінарыі заключаецца ў “ажыцяўленні
любові да бедных ад імя Вярхоўгага Пантыфіка” і менавіта ахвяраванні за благаслаўленні,
з’яўляюцца адной з галоўных фінансавых крыніц для гэтага. “Магчымасць удзялення апостальскага
благаслаўлення ў выглядзе дыпломаў” была ўведзена яшчэ папам Львом ХІІІ. Францішак
надзяліў гэтай функцыяй таксама Апостальскіх нунцыеў.
Працэс упарадкавання
сітуацыі у дадзенай сферы пачаўся ў 2010 г. З 1 студзеня 2015 г. ажыцяўленне дадзенай
паслугі вернецца выключна да кампетэнцыі Апостальскай элемазінарыі, а выручаныя сродкі
будуць накіроўвацца толькі на адну мэту – дабрачынную, гаворыцца ў лісце арцыбіскупа
Краеўскага.