Ֆրանչիսկոս Պապի ցաւակցական հեռագիրերը ի լուր Պուրունտիի մէջ երեք մայրապետներու սպաննութեան։
Երկուշաբթի, 8 սեպտեմբեր 2014-ին, ի լուր Պուրունտիի մէջ, Կիրակի, 7 սեպտեմբեր 2014-ին,
տեղի ունեցած, երեք մայրապետներու վայրագ սպաննութեան, Վատիկանի Պետական Քարտուղար`
Կարտինալ Փիէթրօ Փարոլինը, յանուն Ֆրանչիսկոս Պապին, ցաւակցական երկու հեռագիրեր ուղղած
է` մէկը ''Սավերեան Միսիոնարներու'' միաբանութեան մեծաւորուհիին` Մայր Ինէս Ֆրիցցայի,
իսկ միւսը Թեմի եպիսկոպոսին` գերապայծառ Էվարիսդ Նկոյակոյէի։ Հեռագիրերուն մէջ Կարտինալ
Փարոլինը փոխանցած է Ֆրանչիսկոս Քահանայապետի վիշտն ու ցաւը, ինչպէս նաեւ անոր մօտիկութիւնը,
միաբանութեան կրած ծանր կորուստին համար, յոյս յայտնելով որ թափուած արիւնը դառնայ
յոյսի սերմ` կերտելու համար ժողովուրդներու միջեւ անկեղծ եղբայրութիւն մը։ Վատիկանի
Պետական քարտուղարը հուսկ վստահեցուցած է Քահանայապետին աղօթքները նուիրեալ երեք կրօնաւորուհիներու
հոգիներու փրկութեան համար ինչպէս նաեւ փոխանցած է Պապին առաքելական օրհնութիւնը ննջեցեալներու
ընտանեկան պարագաներուն ու բոլոր անոնց որ ուղղակի կամ անուղղակի կերպով մասնակից են
այս գոյժին։