''Ուքրանիոյ Ճգնաժամը շրջանային եւ մինչեւ իսկ համաշխարհային հետեւանքներ կրնայ ունենալ''
ըսաւ Պան Քի Մուն
ՄԱԿ-ի ընդհանուր քարտուղար` Պան Քի Մուն` դիմելով արեւմտեան երկիրներու ղեկավարութեան,
անգամ մը եւս ըսած է, որ Ուքրանիոյ ճգնաժամը զինուորական լուծում չունի: «Կարեւոր
է, որ անոնք գիտակցին, թէ այս իրավիճակին մէջ զինուորական լուծում չկայ: Քաղաքական լուծման
համար անհրաժեշտ է քաղաքական երկխօսութիւն, ատիկա աւելի ողջամիտ ճամբայ է», յայտարարած
է Քի Մուն` աւելցնելով, որ ինք մտահոգ է Ուքրանիոյ մէջ տեղի ունեցող իրադարձութիւններով
եւ պիտի փափաքէր խուսափիլ ճգնաժամի հետագայ ընթացքէն, որ «կը զարգանայ` վերածուելով շատ
քաոսային եւ վտանգաւոր իրավիճակի»: «Ատիկա ունի շրջանային եւ մինչեւ իսկ համաշխարհային
հետեւանքներ: Ճիշդ այդ պատճառով ես կը դիմեմ ուքրանական եւ ռուսական իշխանութիւններուն`
առաջարկելով միասին նստիլ եւ այդ հարցը լուծել խաղաղ ճամբով` երկխօսութեան միջոցով»,
ըսած է ան: Միւս կողմէ Իտալիոյ արտաքին գործոց նախարար` Ֆետերիքա Մոկերինի, որմի քանի
օր առաջ նշանակուեցաւ Եւրոպական Միութեան արտաքին քաղաքականութեան եւ անվտանգութեան հարցերով
գերագոյն յանձնակատար, յայտարարած է, որ ինք Ռուսիոյ հետ Եւրոպական Միութեան յարաբերութիւնները
այլեւս գործընկերային չի նկատեր: Մոկերինի իտալական «Քորիերէ տելլա Սերա» օրաթերթին
հետ հարցազրոյցի ընթացքին խօսելով Եւրոպական Միութիւն-Ռուսիա գործընկերութեան մասին յայտնած
է. «Այդ գործընկերութիւնը այլեւս գոյութիւն չունի: Ներկայ պահուս Ռուսիան այլեւս ռազմավարական
գործընկեր չի հանդիսանար»: Յայտնենք Մոկերինի Եւրոպական Միութեան արտաքին քաղաքականութեան
եւ անվտանգութեան հարցերով գերագոյն յանձնակատարի պաշտօնը պիտի ստանձնէ 1 նոյեմբերին: