Papa Françesku do të presë përsëri ish-presidentin e Izraelit, Shimon Peres
Të enjten e ardhshme, më 4 shtator, Papa Françesku do të presë në Vatikan ish-presidentin
e Izraelit, Shimon Peres. Pritja do të zhvillohet në Shtëpinë e Shën Martës, në orën
9.45, pas meshës së përditshme në kapelën e shtëpisë ku banon Ati i Shenjtë, njofton
Salla vatikanase e Shtypit. Kujtojmë se më 8 qershor u mbajt, në kopshtet e Vatikanit,
takimi historik i lutjes së Atit të Shenjtë me Patriarkun e Kostandinopojës, Bartolomeu
I, me presidentin izraelit Shimon Peres dhe me presidentin palestinez Abu Mazen. Në
bisedën me gazetarët, duke u kthyer nga Koreja, Atin e Shenjtë e pyetën nëse kishte
dështuar nisma e atëherëshme për paqen, duke qenë se pak më vonë, në Gazë, shpërtheu
dhuna. Me atë rast Françesku u përgjigj: “nuk qe absolutisht dështim” dhe shpjegoi: “U
hap dera e lutjes. U tha: duhet të lutemi. Bëhet fjalë për një dhuratë: paqja është
dhuratë, dhuratë e cila meritohet me punën tonë, por është dhuratë. I duhet thënë
njerëzimit se, përkrah rrugës së negociatave, që është rëndësishme , të dialogut,
që është i rëndësishëm, kemi edhe rrugën e lutjes. Kjo është e sigurt. Pastaj ndodhi
çfarë ndodhi, por kjo është punë konjunkturash. Sjellja njerëzore ka një çast themelor:
lutjen. Tani, tymi i bombave, i luftimeve, nuk na lejon ta shohim derën, por dera
mbetet e hapur”.