Nëna jonë Terezë, ndërmjet dy ditëlindjeve: për tokë e për qiell. Malcolm Muggeridge
“Diçka e bukur për Zotin".
Sot po e kujtojmë Nënë Terezën, ndërmjet dy ditëlindjeve, për tokë e për qiell, përmes
shfletimit të vëllimit, botuar në vitet ’70, “Diçka e bukur për Zotin”, edhe
sot e kësaj dite best-seller botëror. Ishte kjo, vepra që i tregoi për herë të parë
botës, kush ishte Nënë Tereza dhe familja e saj rregulltare. Asokohe bota nuk kishte
dëgjuar ende të flitej për një murgeshë imcake, që endej rrugëve të Kalkutës, për
të shpëtuar, të pashpëtueshmit. E shndërrohej, kështu, në simbol të kujdesit e, sidomos,
të dashurisë së krishterë, për të varfërit. Duke bërë “Diçka të bukur për Zotin. Ky
është edhe titulli i shërbimit fatlum televiziv, që pati xhiruar për Bbc-në, në vitin
1969, në Kalkutë, gazetari i famshëm anglez, Malcolm Muggeridge. Prej këtij
shërbimi lindi edhe libri më i njohur, me të njëjtin titull, në faqet e të cilit
po ritakohemi me Nënë Terezën, ndërmjet dy ditëlindjeve të saj. Nuk është biografi
e mirëfilltë, por përmbledhje e fjalëve dhe e reflektimeve, që gazetari i mblodhi
duke ecur pranë e pranë Nënë Terezës nëpër rrugët e Kalkutës, duke e shoqëruar në
sa zhytej në baltën e mjerimit, për ta nxjerrë njeriun e braktisur e të harruar
nga kjo baltë, në dritën e dashurisë së Zotit për të gjitha krijesat e veta. Bënte,
kështu, “diçka të bukur për Zotin!” Lajtmotiv i veprës e i jetës së asaj, së cilës
i kushtohet libri me këtë titull. Vëllimi, shumë i pasur me foto bardh e zi e
me ngjyra, në format të madh, është shenjë nderimi e dëshmi e autorit, për një grua
që diti, si moskush, të bëhej Ungjill i gjallë mes njerëzve të mbarë botës, të pasur
e të varfër. E pra kur Malcolm Muggeridge e shkruante, askush nuk e njihte
Nënën tonë e askujt nuk i shkonte as nëpër mend se vetë atdheu i Terezës së mohuar,
do të bëhej aq i njohur përmes saj, sa po t’i kujtosh kujt se je shqiptar, të përgjigjet
plot admirim: “Aaa! nga Atdheu i Nënë Terezës!”. Prej këtij libri do të lindte kërshëria
botërore për “zbuluar, Nënë Terezën, këtë personalitet të pashembullt, monument i
dashurisë së krishterë në shekullin e akullimit të saj, e për të bërë “Diçka të bukur
për Zotin” Libri e fton lexuesin të ecë pas Nënë Terezës, në rrugët e mjerimit
me njëmijë fytyra, për të dëgjuar përgjigjen e saj për pyetjet më të shqeta të shpirtit
njerëzor. “Diçka e bukur për Zotin” i propozon ta gjejë lumturinë atje, ku më
pak se kudo e kërkon bota e sotme, që rreket të sulmojë majat e jetës, duke i harruar
fare greminat e saj, ku mund të rrokulliset përças. E duke harruar, sidomos, se duhet
të pranosh Kryqin, nëse dëshiron të lartohesh në lumni... “Diçka e bukur për
Zotin” mbart, në vite, mesazhin e Nënë Terezës, që vijon të shtegtojë në udhët e botës.
E është edhe ftesë drejtuar ne të gjithëve për të bërë “Diçka të bukur për Zotin” Prandaj
e kujtuam të parën këtë vepër. E po kujtojmë edhe autorin e saj: Malcolm Muggeridge,
anglez, që lindi në vitin 1903. E nisi karrierën si lexues në Universitetin e Kairos,
për t’u marrë, më pas, me gazetari. Punoi në disa organe ndërkombëtare shtypi: The
Guardian, Calcuta Statesman, Evening Standarst e Daily Telegraph. Më pas u mor edhe
me programe për radion e televizionin, për llogari të Bbc. Vdiq në vitin 1990, në
moshën 87 vjeçare, pasi kishte krijuar edhe ai “Diçka të bukur për Zotin”. Kishte
bërë të njohur Nënë Terezën, në botë e në Shqipëri, ku ajo hyri për herë të parë në
maje të gishtave përmes ekraneve të shpërfytyruara të televizorëve, deri ditën kur
mundi të shkelë në dheun e saj, prej të cilit kishte gjakun e ku kishte varret e gjinisë.
Hyri, për të bërë dhe në trojet e veta “Diçka të bukur për Zotin”.