Святы Пасад салідарны з мексіканскім біскупам – абаронцам мігрантаў
Апостальская Сталіца
выказала падтрымку мексіканскаму біскупу Табаска Херарда Хесусу Рыверы, якому памежнікі
і супрацоўнікі Інстытута міграцыі Мексікі забаранілі цэлебраваць св. Імшу на мяжы
з Гватэмалай, у месцы, якое называюць “Лампедузай” амерыканскага кантынента. Інцыдэнт
здарыўся некалькі дзён таму, калі іерарх з групай святароў, законнікаў і законніц
вырашыў правесці Эўхарыстыю ў памяць аб 72 мігрантах з Цэнтральнай і Паўднёвай Амерыкі,
якіх у жніўні 2010 г. забілі члены наркамафіі, пасля таго, як тыя адмовіліся на іх
працаваць. “У вас ёсць пяць хвілін, каб сыйсці”, - пачулі святары ад памежнікаў. У
выніку св. Імша прайшла на іншым баку мяжы – на тэрыторыі Гватэмалы.
Пасланне
са словамі падтрымкі біскупу Рыверы накіраваў кардынал Антоніа Марыя Вэльё, старшыня
Папскай рады пастырства мігрантаў і падарожнікаў. Іерарх адзначыў важнасць прыцягнення
ўвагі да праблем мігрантаў і патрэбы ў барацьбе з крымінальнымі групоўкамі, якія выкарыстоўваюць
мігрантаў у сваіх мэтах.