Papa pret famullitarin e Gazës, atë Hernandez: çast hiri e inkurajimi
Papa priti sot Atë Jorge Hernandez, misionar argjentinas i Institutit të Fjalës së
Mishëruar, famullitar i Gazës. Ishte një bisedë e ngarkuar me informacione e emocione,
gjatë së cilës u rikujtuan çastet më dramatike të javëve të fundit, menjëherë pas
këtij takimi me Papën, e intervistuam atin Hernandez:
Përgjigje:
- Për ne, është hir. E nuk është hera e parë, madje, gjatë luftës, Papa Françesku
ka qenë gjithnjë pranë nesh: na ka dërguar edhe një e-mail, të cilin ne e përkthyem
menjëherë në arabisht e u bë i njohur në të gjitha bashkësitë e krishtera, që e falënderuan
nga zemra Papën. E tani, fakti që na thirri për një takim personal me të, për të na
kuptuar, për ta ndjerë nga afër praninë e tij, fjalën e tij, inkurajimin që të jemi
kripë e dritë e kësaj ane të botës.
Pyetje: - Ndonjë fjalë e Papës,
që ju preku më shumë në këtë takim?
Përgjigje: - Është ajo e dëshmisë
së krishterë. Papa tha: “Ungjilli kërkon flijime. Jezusi kërkon nga secili prej nesh
të flijohemi në vise të ndryshme. Ju ju përket ta dëshmoni Jezusin atje, në tokën
që e pa duke vuajtur, që e pa duke vdekur, por ama që e pa edhe duke u ringjallur.
Forca, pra, e zemër. Përpara!”. Ishin këto fjalët e Françeskut, që më prekën më shumë
në shpirt.
Pyetje: - Fjalë inkurajimi, pra, për ta vijuar dëshminë tuaj
të fortë, në këtë tokë të shembur përdhe nga dhembja...
Përgjigje: Po.
Sidomos për jetën tonë të mbushur me dhembje. Papa Françesku është i vetëdijshëm
për faktin që ne jemi pakicë: flitet për 1.300 të krishterë, ndërmjet 2 milionë banorësh,
nga të cilët, vetëm 136, katolikë. Famullia jonë, pra, ka vetëm 136 besimtarë, në
marrëdhënie shumë të mira me ortodoksët. Mundohemi të punojmë krah për krah, po kjo
tashmë dihet. E ecim përpara kështu.