Programi i vizitës së Papës në shenjtëroren e Redipuglia-s
Më 13 shtator, Papa Françesku do të shkojë në Shenjtëroren e Redipuglia-s, në Itali,
për të kujtuar 100-vjetorin e fillimit të Luftës I Botërore, lufta me më shumë viktima
në historinë e njerëzimit. Gjatë vizitës njëditore, Ati i Shenjtë do të shkojë
në varrezën austro-hungareze. Do të hyjë i vetëm në varrezë e do të qëndrojë në lutje
para monumentit qendror, ku do të vendosë edhe një kurorë me lule. Në orën 10.00,
do të kremtojë meshën në shenjtërore. Në fund, do të thotë një lutje për të rënët
e për viktimat e të gjitha luftrave. Papa Françesku do t’u dorëzojë Ordinarëve Ushtarakë
dhe ipeshkvijve të pranishëm një llambë, e cila do të ndizet në çdo dioqezë, gjatë
kremtimeve për përkujtimin e Luftës I Botërore. Në orën 12.00, Ati i Shenjtë do të
kthehet sërish në Vatikan. Shenjtërorja ushtarake e Redipuglia-s është një varrezë
monumentale në krahinën Friuli Venezia Giulia të Italisë. Ndërtuar gjatë epokës fashiste,
i kushtohet kujtimit të 100 mijë ushtarëve italianë, rënë gjatë Luftës I Botërore,
pikërisht në këtë zonë. Shenjtërorja është në qendër të një parku përkujtimor 100
hektarësh në provincën e Gorizia-s, pa dyshim, më i madhi i Italisë, por edhe një
nga më të mëdhenjtë në botë. Çdo 4 nëntor, këtu përkujtohen zyrtarisht 689 mijë ushtarët
italianë, që humbën jetën gjatë Luftës I Botërore, e cila për Italinë, përfundoi më
4 nëntor 1918.