Patriarkët e Kishave Lindore: thirrje për të krishterët e persekutuar nga ISIS
Në një deklaratë të publikuar në fund të mbledhjes së djeshme në Liban, patriarkët
e krerët e Kishave Lindore denoncojnë “krimet kundër njerëzimit”, kryer nga xhihadistët
e Shtetit Islamik të Irakut e Sirisë, sidomos persekutimin e të krishterëve, të jazidëve
e të pakicave të tjera. Prania e krishterë, nënvizojnë Patriarkët, është në rrezik
në disa vende, në veçanti, në Egjipt, Siri dhe Irak. “Të krishterët janë viktima të
sulmeve e të krimeve të urryera, që i shtyjnë të emigrojnë nga vendet e tyre, ku janë
qytetarë që prej mëse njëmijë vjetësh. Shoqëritë islamike dhe arabe privohen kështu
nga një pasuri e rëndësishme njerëzore, kulturore, shkencore, ekonomike e kombëtare”. Patriarkët
përmendin gjendjen katastrofike në Mosul e në 13 fshatra të tjera të Pllajës së Ninives,
në Irak, ku xhihadistët kanë shkaktuar shpërnguljen e mëse 120 mijë vetëve, kanë dhunuar
kisha, xhami e shenjtërore dhe kanë shkatërruar shtëpitë e braktisura nga popullsia,
që është detyruar të fshihet në zonat kurde të Erbilit e të Dohukut. Krerët e
Kishave Lindore kërkojnë një ndërhyrje të vendosur për të ndaluar “veprat kriminale”
të ISIS-it. U kërkojnë sidomos institucioneve islamike të dalin hapur kundër xhihadistëve,
të cilët, përfundon deklarata, dëmtojnë ndjeshëm imazhin e Islamit në botë.