Më 25 gusht përkujtohet Shën Jozef Kalasanci. U lind më 1557 në Spanjë dhe
u shugurua meshtar në moshën 26-vjeçare. Pasi mbuloi detyra të ndryshme nëpër dioqezat
e vendlindjes, shkoi në Romë, ku, i prekur thellë nga gjendja e mjerueshme e fëmijëve
të braktisur, themeloi një urdhër rregulltar për edukimin e të varfërve. Bashkë me
rregulltarët e urdhrit të vet, të cilët u quajtën “skolopë”, sepse themeluan shkollat
për të varfrit, luftoi me forcë analfabetizmin, injorancën dhe kriminalitetin. Ja
çfarë shkruante shenjtori për misionin në fushën e arsimit: “Është mision tej mase
i fisëm dhe burim meritash të shumta të përkushtohesh për edukimin e fëmijëve, veçanërisht
të të varfërve, për t’i ndihmuar të arrijnë jetën e pasosur. Kush bëhet mësuesi i
tyre dhe, me anë të formimit intelektual, punon për t’i edukuar, sidomos në fe dhe
në përshpirtëri, kryen kundrejt fëmijëve shërbesën e vetë engjëllit të tyre rojtar
dhe ka merita të mëdha për zhvillimin e tyre njerëzor dhe të krishterë”. Më
26 gusht përkujtohet Zoja e Çestohovës. Thesari më i çmueshëm i Jasna Gorës (Poloni)
është Figura e Mrekullueshme e sojës. Jasna Gorën nuk e bëri shenjtëroren më të famshme
të Polonisë tradita sipas të cilës shëmbëllimin e Zojës e ka pikturuar ungjilltari
Lukë, por fakti se ajo bëri për vete mrekullisht shtegtarë të pafundmë nga mbarë bota.
Më 27 gusht përkujtohet Shën Monika, nëna e Shën Agostinit. U lind në Tagaste
(Afrikë) më 332 dhe u njoh me Shkrimin e Shenjtë që në rini të hershme. Mbeti e vejë
në moshën 39-vjeçare dhe iu desh të përballonte e vetme jetën e të gjithë familjes.
Natën e pashkëve të vitit 387 pati gëzimin të shihte duke u pagëzuar në Milano Agostinin,
birin për të cilin ishte lutur për vite të tëra që të bëhej i krishterë. Pas pagëzimit
Agostini vendosi të kthehej në Afrikë, për t’iu kushtuar jetës murgare. Në librin
e “Rrëfimeve” Agostini flet për bisedat shpirtërore me Shën Monikën, në qetësinë e
shëtpisë në Ostia (afër Romës). Ajo që e kishte lindur në jetën e kësaj bote, pasi
e lindi të birin edhe për jetën e amshuar, pushoi e lumtur në Zotin më 27 gusht 387.
Më 28 gusht përkujtohet Shën Agostini. U lind në Tagaste, sot Souk-Ahras
(Algjeri), më 13 nëntor 354 dhe, pasi e kërkoi dijen e vërtetë duke ndjekur rryma
të ndryshme të filozofisë e oratorisë, u njoh në Milano me ipeshkvin e këtij qyteti
lombard, Shën Ambrozin, i cili i kumtoi Krishtin dhe e pagëzoi. Pas vdekjes së Shën
Monikës, nëna që ishte lutur gjatë e me besim për kthimin e tij në krishtërim, shkoi
në Iponë (Afrikë), ku u shugurua meshtar e ipeshkëv. Ushtroi me zell shërbesën baritore
dhe la një sërë veprash teologjike e filozofike me vlerë monumentale. Vdiq në Iponën
e pushtuar nga vandalët më 28 gusht 430. Më 29 gusht përkujtohet martirizimi
i Shën Gjon Pagëzuesit. Gjoni e vulosi misionin si paraardhës me aktin e dhurimit
të jetës. Herodi Antipë, pasi e burgosi në një kështjellë në afërsi të Detit të Vdekur,
e dënoi me prerje koke. Përballë Jezusit, që kumtonte lajmin e mirë, ai tha: “Tani
gëzimi im është i plotë; ai duhet të rritet e unë të zvogëlohem”. Më 30 gusht
përkujtohet Shën Pjetri nga Trevi. U lind në shekullin XII në Abruzzo, nga ku
u largua për t’i ikur një martese me shkuesi, dhe jetoi në Lacio. Ipeshkvi i Tivolit
i dha lejen të predikonte në atë dioqezë, por më vonë u vendos në një luginë në afërsi
të Subiaco-s, prej ku nisej për të predikuar nëpër rrethinat e kësaj krahine të Italisë
qendrore. Vdiq më 1052 dhe u shpall shenjtor më 1215. Më 31 gusht është
diel, festa e Zotit.