Францішак спачувае з прычыны смерці кардынала Эдмунда Шокі
Папа Францішак выказаў
спачуванні ў сувязі са смерцю амерыканскага кардынала Эдмунда Казіміра Шокі. 86-гадовы
пурпурат быў арцыбіскупам Дэтройта, старшынёй Прэфектуры па эканамічных справах Апостальскай
Сталіцы, кіраваў Губернатаратам Дзяржавы Ватыкан і Папскай камісіяй па справах Дзяржавы
Ватыкан. Ён закончыў свой зямны шлях вечарам 21 жніўня 2014 г. у адным са шпіталёў
Мічыгана. У спачувальнай тэлеграме, скіраванай на імя апостальскага нунцыя ў ЗША арцыбіскупа
Карла Марыі Вігано, Францішак з удзячнасцю ўспамінае пра “нястомнае біскупскае служэнне”
пурпурата ў Гейлордзе і Дэтройце, пра “гады яго службы Апостальскай Сталіцыі і Дзяржаве
Ватыкан” і давярае “душу гэтага шчодрага слугі Хрыста і Касцёла міласэрнай любові
Бога”.
Кардынал Шока, паходзіў з сям’і польскіх мігрантаў. Вывучаў кананічнае
права ў Папскім Урбаніянскім і Папскім Латэранскім універсітэтах. Пасля гадоў біскупскага
служэння ў Злучаных Штатах быў пакліканы на службу ў Ватыкан. Пурпурны берэт атрымаў
з рук св. Яна Паўла II у 1988 г. Пасля яго смерці, Калегія кардыналаў складаецца з
211 пурпуратаў, з якіх 118 выбаршчыкаў і 93 – без права голасу на канклаве .