Францішак сустрэўся з лідэрамі свецкіх вернікаў Паўднёвай Карэі
Клапаціцца пра бедных
і спрыяць чалавечаму развіццю – гэта павінны быць два “полюсы” дзейнасці свецкіх вернікаў,
лічыць папа Францішак. На заканчэнне трэцяга дня апостальскага падарожжа ў Паўднёвую
Карэю Святы Айцец правёў сустрэчу з лідэрамі Апостальства свецкіх – аб’яднання вернікаў,
якое налічвае 37 структур ў 16 дыяцэзіях краіны. Звяртаючыся да прысутных Папа адзначыў,
што Касцёл у Карэі з’яўляецца спадкаемцам веры пакаленняў свецкіх вернікаў, якія захавалі
любоў да Езуса Хрыста і адзінства з Касцёлам, нягледзячы на недахоп святароў і цяжкі
пераслед. Францішак нагадаў, што беатыфікаваныя ім 16 жніўня 2014 г. 124 карэйскія
мучанікі, акрамя веры, давалі вялікае сведчанне любячай салідарнасці ў сваіх хрысціянскіх
супольнасцях.
Сёння, як і заўсёды, Касцёл патрабуе пераканаўчага сведчання
свецкіх вернікаў. Паводле Папы, багацце дароў, якім яны валодаюць, павінна быць пастаўлена
на службу ўдасканеленню грамадскага парадку і яго падрыхтоўкі да надыходу Божага Валадарства.
Францішак з удзячнасцю адзначыў шматлікія ініцыятывы карэйскіх вернікаў, скіраваныя
на карысць бедных і патрабуючых.
“Дапамога бедным – гэта справа добрая і неабходная,
але яе недастаткова”, - сказаў Папа і заклікаў лідэраў апостальства свецкіх спрыяць
чалавечаму развіццю і абароне годнасці людзей. У першую чаргу, неабходна, каб кожны
чалавек мог спазнаць радасць, якая паходзіць ад магчымасці зарабляць на хлеб штодзённы,
утрымліваць уласную сям’ю. Гэта годнасць, паводле Святога Айца, знаходзіцца пад пагрозай
з боку культуры грошай, якая пакідае без працы вялікую колькасць людзей. “Ён і яна,
якія не маюць працы, павінны адчуваць у сваім сэрцы годнасць, звязаную з магчымасцю
прыносіць хлеб дамоў, зарабляць на хлеб. Давяраю вам гэту працу”, - сказаў Францішак.
Пасля
сустрэчы са свецкімі вернікамі Папа пакінуў мястэчка Ккаттаннэ і на верталёце вярнуўся
ў Сеул.